El filmo ‘Desperate Hours` trusho un sujeto al orden del dia: el rolo de los profesores dj

Dora NİYEGO

Desde un sierto tiempo ke en la sityo ‘Ladino Komunita’ del Internet, los myembros estan eskrivyendo sovre el filmo ‘Desperate Hours’ i estan diskutyendo sovre al sujeto de los profesores djudyos ke se refujieron en la Turkiya durante la Sigunda Gerra Mondial. I yo me desidi de investigar este sujeto en el Internet, i vos  transmeto el rezultado de esta bushkida..
 "Duspues del establisimiento de la Republika Turka, Mustafa Kemal Atatürk se metyo a azer reformas en el payis. Desde el anyo 1923 fin  1938, el se konsentro en la modernizasyon de la Turkiya, bazandose sovre los modeles evropeos. Sus varios planos sovre la modernizasyon de la edukasyon Turka avyeron el kamino a grandes reformes de las universidades de Estanbol i de Ankara.
El Ministro del  Eksterior se adreso al Profesor Andreas Schwartz de Zurih sovre este sujeto i le demando de kontaktar los profesores de la Almanya afin de organizar un programa de reforma en el payis. El Governo Turko estava pronto a engajar estos profesores sin konsiderar sus relijyones. El solo kriterio era la performansa akademika de los kandidatos. La Gestapo peno muncho a meter entrompesos  a la despartisyon de los profesores djudyos ma el Governo Turko reusho a salvar ansi mizmo los profesores aprezados.
Duspues de la muerte de Atatürk, en el anyo 1938, su suksesor i en mezmo tiempo su amigo entimo  Ismet Inönü kontinuo la mezma politika.
El Governo Turko sinyo kontratos kon munchos profesores djudyos i aksepto a pagarles una buena mezada. Los primeros anyos estos profesores fueron permetidos a ansenyar en sus linguas nativas kon tradutores, ma duspues del kuatren anyo, eyos deviyan de ansenyar en Turko.
El 18 Novembro 1933, La Grande Asamblea Nasyonal (Büyük Millet Meclisi) kito una mueva ley i ramplaso la vyeja eskola (Darülfünun) por la mueva, ke es la Universidad de Estanbol de oy (Istanbul Üniversitesi).
Kon la dezinyasyon de los profesores djudyos,  la mueva Universidad se izo en poko tyempo uno de los mas grandes sentros de edukasyon i de investigasyon de la Evropa. Otras universidades fueron tambyen fondadas: komo la Fakultad de Linguas,  Istorya i  Jeografya, la Fakultad de Juristos, i el Instituto de Agrikultura.
Munchos de los sientifikos ke se fueron a Ankara fondaron las Fakultades de Arte, Muzika i Medikeria en esta sivdad. El ekspulsado architekto Clemens Holmeister ayudo a konstruizar los edifisios de la Asamblea Nasyonal i el profesor Paul Hindemit, el edifisio del Opera i el Teatro del Estado.
En el anyo 1935, duspues de la promulgasyon de las leyes de Nuremberg, los bibliotekarios fueron forsados de abandonar sus karreras. Estos bibliotekarios ke avian sido akseptados en Turkiya aplikaron un korso de tres mezes en las librerias. Eyos izyeron adelantar el sistema de las librerias en el payis en dando lekturas en las provensas, en establisando muevas institusyones i en publikando magazines siantifikas. La mayoridad de estos korsos se davan en las Fakultades de Medisina, Matematika, Sensia Natural, Sensya Juridika i Arte.
Aproksimativamente dozyentos profesores fuyeron de La Almanya a la Turkiya, los syen de entre eyos eran djudyos. Profesor Robert Anheggar (kazado a una mujer djudiya) ansenyo la lingua i la litertura Almana. El linguisto djudyo Profesor Andrea Tietze ansenyo las linguas del Medio Oriente i se izo Turkolojisto en Los Angeles duspues de la gerra. El filolojisto djudyo Profesor Erich Auerbach ansenyo literatura i eskrivyo el selebre livro ‘Mimesis’. Los profesores Edward Said i Rudolf Nissan ansenyaron en la Fakultad de Medisina. El profesor E. D. Hirsch ansenyo la Kultura Literar. Los profesores Elifz Newmark i Dr. Felix Hariwitz ansenyaron ekonamia i el profesor David Zimmerman ansenyo istoria. Los bibliotekarios Sonia Tiedecke, Dr. Max Pfannestiel, Dr. Walter Gottschalk adelantaron el sistema de las librerias en diferentes fakultades.
Estos profesores kontribuaron a la organizasyon del  sistema Evropeo moderno en las universidades Turkas. Eyos lavoraron kon muncha kerensia, se ambezaron el Turko, tuvyeron amigos Turkos i ansi  pontes fueron kreados entre el Oksidente i el Oriente. Munchos de entre eyos emigraron a los Etados Unidos duspues de la gerra, i unos kuantos resivyeron la identidad Turka, Profesor Hirsch syendo uno de estos. Aparte de ansenyar en las universidades, syertos partisiparon en munchos  proyektos reformadores en la Turkiya. Se dize kel Profesor Albert Einstein les ayudo muncho a fuirsen de la Almanya.
 Akeyos diyas, en munchos payizes Evropeos se dizia ke ‘La Universidad de Estanbol era la mijor universidad Almana establisada afuera de la Almanya’.