El Purim de Saragosa

Dora NİYEGO
adaptado al Judeo-Espanyol por

Antes munchos anyos,en Espanya, en una grande kaleja de  Saragosa ande moravan munchos Djudyos, aviya dodje Sinagogas. En la vijita anual del Rey, los dirijentes de la Komunidad Djudiya  ivan a resivirlo kon tres Sefer Toras de kada Sinagoga, vistidos de oro i de plata. Este akto de respekto plaziya muncho al Rey.
Un diya los dirijentes  tomaron la desizyon de kitar los Sefer Toras de sus vistidos, prezervarlos en el Aaron Akodesh i kaminar los vistidos vaziyos. En el palasyo del Rey, aviya un funksyonaryo nombrado  Marcus, ke era un konverto del Judaizmo. Marcus era  malo i enimigo de los djudiyos. El diya antes de la vijita, el deklaro este sekreto al Rey.
Kon  grande kolora, el Rey ordono a sus soldados de avrir los Sefer Toras i mirar aryento i si lo ke avia dicho Marcus era verdad,  de kemar todas las Sinagogas i matar  todos los djudiyos.
Akeya noche, uno de los Shamases izo un esfuenyo muy sinyifikativo. El Profeta Eliah le aparesio  i le disho de meter atras los rulos de la Tora en sus vistidos. El shamas, emosyonado,se desperto a media noche i fue immediatamente a las Sinagogas azer  lo ke el Profeta Eliah le avia rekomendado.
Al diya sigyente, kuando los soldados del Rey toparon los rulos aryento de sus vistidos, el Rey les ordono de apanyar  Marcus i enkolgarlo de vista.
De verguensa, afin de eskuzarse , el Monarko deklaro al publiko ke  siempre tendra konfiensa en la fidelidad de los Djudiyos, i komo un sinyo de su buena intisyon, les prometyo de  anular sus taksas por tres anyos.
Kuando los Djudyos se ambezaron  komo fueron salvados, eyos no se pudyeron kreer en este mirakolo i ansi desidaron de konsiderar kada anyo el 17 Fevrero (Shevat) komo el diya de 'Purim de Saragosa'.
Oy en diya, munchas famiyas Sefarades selebran este diya i  meldan una megilla espesiyal para remersiar al Dio por este mirakolo.