La Kreatrisa de la Marka DKNY - Donna Karan

Dora NİYEGO(Adaptado de un lavoro de Sara Sason)‘Todo lo ke kreyi fin agora es la produksiyon de la relasion entre mi puerpo i mi meoyo. Segun mi, dezinyar es la ekspresyon de ser mujer kon todos sus sentimientos i todos sus konfliktos` dize la selebre dezinyatora Donna Karan.

Judeo-Espanyol
9 Ocak 2008 Çarşamba
En el anyo 1949, Donna Karan, ija de una famiya djudiya, nasyo en Queens, el sentro de la moda de New York.  El padre de Donna, ke era un buen shastre muryo kuando Donna teniya tres anyos. Su madre era una manekena de ‘show room’ i una reprezantante de vendita. El padrasto de Donna, Harold Flaksman, tambien estava en el echo de dezinyo. Por esta razon, Donna preparo i prezento su primera koleksyon kuando eya dayinda era una eleva en el lise.
Komo Donna era una eleva muy reushida en la eskola Parson’s Design, la selebra dezinyatora Anne Klein le propozo de lavorar kon eya un enverano entero. Esta koinsidensya fue la kavza del trokamyento en la vida de Donna Karan. Donna lavoro komo dezinyatora al lado de Anne Klein tres anyos enteros. Kuando Anne Klein muryo de kanser, todos la estavan konsiderando komo la eredatora de Anne Klein. Kon el ayudo de Louis Dell’Olio (un amigo de klasa), Donna preparo ‘la koleksyon Anne Klein’.
Entremientes, Donna se kazo kon Mark Karan i paryo una ijika, Gabriella. Ma esta alegriya no turo muncho, el kuplo se kitaron i Donna se kazo de muevo kon Stephan Weis, ke era su amor de chikes.
Diez anyos despues, kon el apoyo de Tokiyho, el muevo posedor de la kompaniya de Anne Klein, Donna kreyo su marka ke es la refleksyon de sus instinktos femininos.
En el otonyo del anyo 1985, eya kreo la primera koleksyon Donna Karan. La reaksyon de la presa anonso al mundo entero el nasimyento de una mueva estreya.
Kuando le demandan a Donna Karan, kualo es el sekreto de su reushita, eya responde ‘Fasilitar la vida de las mujeres. Yo so una mujer a ken le plaze ayudar a las personas. El esprito de artista ke esta aryento de mi me esta forsando a esforsarme para kreyar ermozuras por las mujeres’.
La koleksyon de Donna Karan, ‘Seven Easy Pieces’ (Siete Pedasos Fasiles) izo un grande sukse kuando salyo a la plasa. Estos siete pedasos son vistimyentas ke se pueden vistir invyerno i enverano en todas las okasyones.
 ‘Akeyos diyas, mi ija Gabby i yo no estavamos pudiendo topar ke vistir. Mos estavamos emprestando los vestidos de una a la otra. No se estava topando un blue jean komo keriyamos. A la fin pensi de kreyar una marka mueva. Ansina fue el nasimyento de DKNY’ esta dizyendo la selebre desinyatora.
 ‘Kuando me demandan "Deke DKNY?", les digo ke el NY ke esta emprimado enriva la etiketa sinyifika el rapido movimiento de New York. Por mi New York es una vyeja sivdad ke tyene un futuro briyante. Esta sivdad reprezenta el modernizmo endjuntos kon el klasisizmo. New York es el enkontro del pasado kon el futuro.’
La filozofiya de Donna Karan se puede rezumar en una fraze: ‘Lo poko i lo propio es lo ermozo’.
El stil ke kreyo Donna Karan es inspirado de su talento ke viene de nasimyento. Malgrado su rapido tiempo de lavoro, Donna tuvo tiempo para azer otros tres ijos.
Por Donna Karan, la moda no es limitada kon vestimyentos. Para eya, la moda es una forma de bivir. Los numerozos aksesoryos ke eya empleya en sus vestimyentas sembolizan el rapido movimiento de New York
Mas despues, kon el ayudo de su marido, la marka DKNY se establiso mizmo en el mundo de kozmetikos por ombres i mujeres.
 ‘Todo es tokar i sentir’ ke es el tema de ‘DKNY Home Collection’ fue desinyada por Donna Karan por las kazas luksuozas de New York.
En el anyo 2001, Donna Karan peryo a su marido Stephan. Eya miro de olvidarse su tristesa kon su amor por su inyeto.
Donna Karan resivyo numerozos premios i eya fue invitada por el‘Council of Fashion Designers of America’ sesh vezes.
Karan fue lidera de munchas organizasyones sosyales i les ayudo en diversas maneras.
Despues de la muerte de su marido Donna Karan vendyo su marka a la kompanyiya Louis Vitton Moet Honnessy por milyones de dolares. Ma eya kontinuo a lavorar komo desinyatora.
Donna Karan dio su nombre a mas de syen magazenes en el mundo entero. Eya selebro sus vente anyos de reushita kon su livro ‘The Journey of a Womanᆨ Years of Donna Karan’. Eya remetyo el revenido de este livro a las organizasyones ke estan luchando kon el kanser.
La selebra marka ke Donna Karan kreyo, DKNY, fue el simbolo de la mujer enerjika ke se aze de mil pedasos en koryendo el diya entero entre su kaza i su echo ma sin neglijar su aparensia i su vestimienta.
La semana pasada, Donna Karan fue invitada a Israel de la parte del Sigundo Primer Ministro, Ehud Olmert.
Despues de esta entrevista, Donna Karan dio una deklarasyon a los jurnalistos dizyendo ke Olmert le dio informasiones sovre el sujeto de los investisimientos etranjeros en Israel i le propozo de preparar una produksyon mueva en Israel.
Karan se intereso muncho en esta propozisyon i prometyo a Ehud Olmert de kontaktar el Ministerio de Komersio de Israel sovre el sujeto de investisimientos i eksportasyon en Israel.