El nombre ‘Tu Bishvat’ viene de la data de la fiesta ke es el kinzen dia del mez Shevat (Febrero). ‘Tu’ es el numero 15 reprezentado kon los shifros ebreos..
"Uva", "trigo", "azituna", "datile", "igo", "granada" son las frutas preferadas ke se komen en Tu Bishvat porke estas frutas son asosiadas kon Erets Yisrael.
Este dia es fiestado kon una grande seremonia i kon entuziasmo en las eskolas djudias, en las sinagogas i en las komunidades djudias, en Israel i en el mundo entero.
Es tradisyonal de komer diferentes formas de frutas i de dizir la Beraha de kada fruta en esta fiesta.
Tu Bishvat se fiesta mezmo en las kazas. Frutas freskas i frutas sekas se meten en un chini, i a las vezes, en Estambol; es uzo de komer ‘ashure’- ke es una forma de ‘muhallebi’ echo kon frutas sekas.
Setenta anyos antes, Rabbi David Eskenazi de la sivdad de Varna de Bulgaria vino a Estambol i fue nominado komo muevo rabino en la Sinagoga Hemdat Israel en Haydarpasha. El era un rabino moderno i enstruido i fue el pionero ke la fiesta "Tu Bishvat" se selebre en la Sinagoga Hemdat Israel kada anyo.
Este anyo "Tu Bishvat" kayo al tredje de Febrero, ma komo es el uzo de selebrar kada anyo este fyesta en alhad, eya fue selebrada en la Sinagoga Hemdat Israel el dodje de Febrero.
La fiesta empeso kon la entrada del Gran Rabino Rav Izak Haleva, akompanyado del koro ‘Baruch Aba’ del Talmud Torah. En su "diskorso de entrada" el prezidente de la Fundasyon de la Sinagoga Hemdat Israel,el Sn. Sedat Amon mos dio la novela ke de agora adelantre, la Sinagoga Hemdat Israel se va avrir kada Shabat.
El sigundo konferansyer "Albert Levi" avlo de su chikes, de su manseves, de su boda i de los ermozos dias ke el paso en esta Sinagoga i en este kuartyer.
El treser diskorsador "Rav Leon Adoni" mos dio la sinyifikasyon de esta fiesta i ekspreso su intenso dezeo de ver sus amigos de chikes en esta Sinagoga, mezmo duspues tantos anyos.
El muevo prezidente del Talmud Torah, Yosi Kalaora rengrasio el Bet Din por averlo topado dinyo de okupar este posto.
Duspues de la piesa teatral sovre los arvoles i las kantikas, de los ijikos del Talmud Torah, el prezidente de muestra komunidad "Silvyo Ovadya" tomo la palavra i insistyo sovre la emportansa de la komunidad djudia de parte de Kadiköy.
El koro de Maftirim dio un konserto de tres kantikas. Duspues del koro, El Gran Rabino Izak Haleva tomo la palavra i endiko ke kada anyo Tu Bishvat se fiesta en esta Sinagoga i aze ansi, en este grande dia, unir los djudyos de Estanbol en un mezmo lugar.
Komo en Israel i en el mundo entero, este anyo Tu Bishvat komo kada anyo fue selebrado kon grande entuziasmo en la Sinagoaga Hemdat Israel. El Dio ke mos ayege ke todos los djudyos del mundo selebren esta fiesta kada anyo, kon la mezma alegria en el mezmo entuziasmo.
