Habib GEREZTürk Yahudilerinin aydınlanma ve sanattaki yeri, tarihsel süreçteki gelişimi ve sanatçı kavramını Habib Gerez`in perspektifinden yayınlıyoruz
Klara PERAHYA
Un seryozo problema esta en este momento rebolteando el esprito de la mas parte de los sitizanos fransezes, un sentimyento de deskonfiensa enverso la justisya de sus propyo payis... un sentimyento de dubyo.
Aunke eredadera del rasyonalizmo de Descartes i del umanizmo (a diversas epokas) de Montaigne , Jean Jacques Rousseau, Albert Camus ets... prinsipal protagonista de la "Deklarasyon de los Derechos del Ombre" de 1948 , payis ke desde siglos afirmo ser el promotor i el garante de la defensa de la libertad i de la egalidad, la Fransya o mas presizamente su "Sistema Judisyal" avyo involuntaryamente el kamino a una terrivle error la kuala fue la kavza del inkarselamyento provizoryo de inosentes konsiderados indjustamente komo responsavles de aktos infamantes ke eyos no avian kometido.
Ay de esto tres o kuatro anyos, en la chika sivdad franseza nombrada "Outreau", un horrivle abuzo seksual fue perpetrado sovre kriaturas sin defensya, molestadas por sus propyos paryentes .... la infamia fue enfin deskovyerta, funksyonaryos atitrados de la Polisia intervenyeron i oyeron las deklarasyones de las viktimas, las kualas akulparon un grande grupo de personas .
El djuzgador de instruksyon en karga de la primera interrogasyon judisyal aparejo, ansi ke es de uzo, un dosye ke devia servir de baza para el empesijo de una aksyon legal .
Malorozamente, la depozisyon echa por los ninyos era parsyalmente falsa. Probavlemente mitomanos (komo lo son syertos a esta edad), eyos avian, sin rendersen puede ser kuento de la gravita de la koza, akuzado no solo kulpantes ma tambyen inosentes, los kualos aunke protestaron kon vehemensa, no fueron nunka verdaderamente oidos.
El responsavle Judisyal en kestyon era, el, un prinsipyante aedado solo de 25 anyos, muevo salido de la Eskola de Majistratura, ainda imprenyado del rijid ensenyamyento universitaryo, intransijente, orgolyozo de su sensya, i sovre todo sin niguna eksperyensa umana.
Kada vez ke los akuzados fueron de muevo odisyonados, eyos gritaron sus inosensya ma el djuzgador, trespasado el mizmo por la horror del delito, no tomo kaji nunka en konsiderasyon sus afirmasyones de "non kulpabilidad ".
Por seguro munchos otros myembros de la Majistratura tuvyeron tambyen un rolo en el desvelopamyento ulteryor del prosedimyento, ma desde el empesijo, un dosye ke paresia ser konkreto i verdadero, kontinualmente konfirmado por las akuzasyones de los ninyos, (repetadas ma parsyalmente falsas) mentuvo los inkulpados inosentes en situasyon de perpetual akulpamyento.
Ansi, durante mezes i mezes, eyos fueron indjustamente inkarselados, humilyados en sus dinyidad, injuryados i menospresyados, asta la avyertura del proseso en "la Korte de Grave İnkulpasyon" (Ağır ceza Mahkemesi".
Si se analiza el kavzo, se ve ke ay una mankansa en el sistema judisyal el mizmo. Munchos faktores negativos ke puedian ser evitados, jugaron un rolo preponderante; entre otros: la insufizensya de maturidad del djuzgador, su ineksperyensa, la mankura de verdadero dialogo kon los akuzados, el fakto de konfiar a una sola persona, la preparasyon del primer dosye de inkulpasyon, el kual direktamente o indirektamente tuvo por seguro una syerta influensa sovre el desvelopamyento ulteryor del prosedimyento.
Me akodro aver meldado ke" siglos antes, en el <Sistema Judisyal Ebreo> el mas chiko proseso penal empesava kon tres Juzgadores i en los grandes muncho mas" lo ke me fue konfirmado por Rav Adoni.
"Un djuzgador devia ser patron de famiya, kazado i de preferensya aijado, dunke en posesyon de una syerta eksperyensa umana".
"Kada kulpante devia ser persigido por su sola kulpa... ni el padre pagara por el ijo... ni el ijo por el padre" mos dize la Biblia.
La Justisya... la Justisya... la seguiras!
