Reneta Sibel YOLAKDr. Mitzva dışarıda bahçesinde çalışıyordu. Gül çalılıklarını yolmuş, bütün tohumları temizlemiş ve derin bir çukur kazmakla meşgulken telefonu çaldı.
Klara PERAHYA
Ke mos afito en este prisipyo de siglo? Despues de la sorpreza provokada por la dimensyon enorme de la viktorya del HAMAS a la kuala ninguno se asperava, el sujeto el mas diskutido en la prensa mundyal es por seguro, en este momento, la kestyon de las karikaturas del Danemark, publikadas tambyen en syertos otros payizes evropeos. Aunke la violensya de la repuesta de syertos mansevos arabos me parese ser indeniavlemente desmezurada, devo konfesar ke personalmente fui tambyen muy sorprendida por la reaksyon de munchos grandes gazeteros oksidentales, los kualos por kontra persisten a mantener el prinsipyo de una libertad absoluta de ekspresyon, sin limito ni kondisyon. El puevlo Judyo fue una de las mas grandes viktimas de esta libertad de palavra illimitada i inkondisyonal. Kalomnias fueron echas a su sujeto, faktos sin ninguna realidad le fueron atribuidos, i ansi prejuisyos i argumentos sin baza reforsaron el antisemitizmo... Una karikatura es kaji syempre satirika, i una satira es una burla, eya tyene el eskopo de ridikularizar la persona o el grupo de personas a las kualas se refera... ninguno tyene el derecho de umilyar sin razon un puevlo en sus kreensas espirituales El laisizmo no es un refuzo sistematiko de la relijyozidad ma la separasyon entre "lo relijyozo" i "los echos publikos" .... lo ke permete la toleransya i el respekto enverso todo modo de konviksyon a kondisyon ke no yeve en eya un kualkyer fermento de prejuisyo, danyo o detrimento (zarar). La DEKLARASYON DE LOS DERECHOS DEL OMBRE no kontyene solo "derechos" eya kontyene tambyen "doveres". Los derechos no pueden ser illimitados, eyos deven tener komo frontera natural el "oto-kontrol de la konsensya individual", o byen la "aplikasyon de la ley". Es ke todo es negativo en este prisipyo de siglo? Es ke todo es una kavza de "ira" i de pleto? Es ke kale İntervenir o non intervenir? Kedar enserrados en una kayades ke munchos (kon razon) puedran konsiderar komo "indiferensya"? Es ke savemos, sin tener el meno dubyo, ken tyene reelmente razon o ken esta en el yerro ? Kuala de entre todas, es la karakteristika la mas markante de muestra epoka? Por seguro "la "Instabilidad" i tambyen "la Multiplisidad de koryentes kontraryos ke se chaptean los unos a los otro", "Ekstremizmos" , Koegzistensya sorprendente, lado kon lado, de fantastikos esforsos syentifikos i de obskurantizmo...de Espiritualidad i de materyalizmo... De una parte "ekseso de relijyozidad" de la otra "renyegamyento kategoriko, kaji sistematiko de todo modo de kreensa, asta refuzar el mas chiko dubyo a este sujeto". Munchas vezes en keryendo luchar kontra lo ke yamamos fanatizmo relijyozo, kayemos en una otra manera de fanatizmo, reelmente paradoksal ma igualmente perikolozo "el fanatizmo liberal" Ken semos ? Ke savemos reelmente, para afirmar o renyegar kualo ke sea? Komo renunsyar al dubyo, este kestyonamyento kontinual de mozotros a mozotros delantre los problemas insolvables de muestro destino de "kriansas pensantes?"
