Rezultado de una Eleksyon

Klara PERAHYA

La sorpreza fue grande la semana pasada. Las  eleksyones Palestinyanas se pasaron de una manera  korrekta, transparente, ekitavle, ma ninguno se asperava a un rezultado a este grado favoravle por un partido ekstremamente radikal.
 "Un puevlo eskojo el kamino a sigir" o byen, puede ser "refuzo simplemente un pasado de sufriensa i de afrisyon".
La prensa se ekspreso kon volubilidad.....mos kontentimos de rekojer las  deklarasyones echas por diferentes "Responsavles de la Politika Oksidental" ke topimos en las gazetas Fransezas i partikularmente en el "Nouvel Observateur"  afin de darvos un chiko rezumen en Judeo-Espanyol, de unas kuantas de entre eyas:   

Ehud Olmert, Primer Ministro tenyente Israelyano
Israel no puede achetar kel Hamas. en su forma aktual ,aga parte de la Autoridad Palestinyana .
El Hamas es una Organizasyon terrorista ke prekoniza la destruksyon de Israel, el deve ser dezarmado.:
Yo no puedo tener un dialogo politiko kon un governo Palestinyano ke no respekta sus engajamyentos los mas fundamentales i ke no lucha kontra el terrorizmo.
Estamos prontos a ayudar muncho los Palestinyanos i el Prezidente  Abou Mazen (Mahmoud Abbas), ma eyos deven respektar sus engajamyentos.
El dialogo deve ser bazado sovre la konfiensa, i no puedemos tener konfiensa en una Institusyon ke tyene  el Hamas komo myembro. - (Komunikado de Myerkoles el 25 Enero )

Binyamin Netanyahu, shef del Likoud:
Penso ke kale aplikar una presyon ekonomika internasyonal sovre este muevo governo afin ke adopte una politika diferente, mas pasifika, lo ke puedra dar un poko de esperansa a muestro puevlo ,
el kual otramente sera kondanado a un konflikto eternal.
Penso tambyen ke se deve meter fin a la politika de retiros unilaterales, los kualos tyenen por solo rezultado de reforsar enormamente la popularidad del Hamas, lo ke a su torno va fortifikar el terrorizmo.

Mahmoud Abbas, prézidente de la
Autoridad Palestinyana
Las eleksyones fueron transparentes ansi ke ekitavles, i todos los partidos deven respektar los rezultados
 Demando a todos los partidos de respektar la ley i de akseptar la voluntad del puevlo. - (komunikado, Jueves 26 enero)

Scott Meclellan, Reprezentante de la "Kaza Blanka".
El puevlo Palestinyano voto para el trokamyento. Ma sus aspirasyones a la paz ansi ke a una vida kalma no trokaron.
Uno de los grandes aventajes de la demokrasia es ke eya ovliga los dirijentes a dar kuentos,
I si ay korrupsyon o byen si el governo no responde a los menesteres de la populasyon , esta populasyon tyene la posivilidad de votar por un otro trokamyento. - (Deklarasyon echa Vyernes el 27 Enero)

George W. Bush
Kestyonado sovre la viktorya del Hamas en las eleksyones lejislativas Palestinyanas , el Prezidente Amerikano respondyo kel Partido  Radikal deve absolutamente renunsyar a kerer destruir el estado  Israelyano, aliado de los Estados Unidos.
El auguro kel Prezidente Palestinyano  Mahmoud Abbas kede en su posto . (konferensya de Prensa del 26 Enero)

Condoleezza  Rice,  Sekretarya de estado Amerikana
El puevlo Palestinyano voto por el trokamyento, ma pensamos ke sus aspirasyones por la paz i una vida kalma no trokaron. Estas aspirasyones no puedran ser kontentadas ke solo si se parvyene a una
" solusyon de dos Estados", lo ke egzije la renusyasyon a la violensa i al terrorizmo i  la akseptasyon de la egzistensya de Israel.
Muestra opozisyon al Hamas no troko. "No se puede tener un pye en la politika i el otro en el terrorizmo" :
 Los Palestinyanos tyenen un "prosesus" konstitusyonal ke eyos deven sigir i yamamos todos los partidos a respektarlo afin ke el se dezarroye en una atmosfera de kalmo i seguridad. - (Deklarasyon echa Juevez el 26 Enero)

Kofi Annan, Sekretaryo Jeneral de las
Nasyones Unidas
Felisito el Prezidente de la Autoridad Mahmud Abbas ansi kel puevlo Palestinyano por el  dezarroyo pasifiko de las eleksyones lejislativas. - (Deklarasyon echa Juevez 26 Enero)

Tony Blair, por la boz de su vocero (sözcü)
Londra no puede tratar ke solo kon los ke renunsyaron al terrorizmo.
Rekonosemos por seguro los mandatos elektorales, ma en mizmo tyempo las personas deven ser klaras "No puedemos tratar ke solo kon los ke renunsyan al terrorizmo".
La distinksyon es klara.Es importante kel Hamas entyenda ke deve desidir entre el kamino verso la demokrasia o el kamino verso la violensa.
La Grande Bretanya rekonose byen entendido el mandato del Hamas, porke el puevlo se ekspreso de esta manera .
La sola manera de ayegar a una solusyon ke puedra kontentar el puevlo Palestinyano repoza sovre la demokrasia i la ko-egzistensya pasifika entre el Estado Israelyano i un Estado Palestinyano independyente. -(Deklarasyon del 26 Enero)

Jack Straw,kapo de la diplomasia Britanika
"El Hamas obtuvo reelmente una kuantidad importante de votos i la Komunidad Internasyonal respekta el rezultado de una eleksyon demokratika i djusta., ma el Hamas tyene de eskojer entre dos kaminos.
Es ke el puedra parvenir a transformarse en un partido politiko? Si tal sera el kavzo, el va obtener el apoyo de la Komunidad Internasyonal. Ma si el eskoje el otro kamino, si el eskoje el terrorizmo, alora la demokrasia no va pueder transijir (uzlaşmak) kon el terrorizmo." - (Deklarasyon echa juevez el 26 Enero)

Dominique de Villepin, Primer Ministro Fransez
Mos topamos delantre una situasyon ke me pusha a ekspresar mi inkyetud. Dezeo ke las kondisyones indispensavles para un lavoro kon el Governo Palestinyano seyan kumplidas.
Para la Fransya estas kondisyones son antes de todo: la renunsya a la violensa ansi ke la akseptasyon de los objektivos de paz ke ya fueron fiksados. I tambyen la rekonosensya del Estado de Israel i de los akordos internasyonales. - (Deklarasyon echa Juevez el 26 Enero)

Jean-Baptiste Mattéi,  Reprezentante del
"Quai d'Orsay "
O byen el Hamas se engaja en un kamino politiko , o byen el kontinuara sovre un kamino afuera la politika. Es a el de eskojer.
Tres kondisyones son echas al Hamas afin ke ayga un dialogo: "la renunsyasyon a la violensa", "la rekonosensya del derecho de Israel a egzistir" i "la rekonosensya de los paktos ke fueron echos entre  el OLP i Israel, en partikular los akordos de Paz de Oslo":
La eleksyon se paso de una manera demokratika i ninguno kontesta los rezultados, esto es una realidad ke se se deve tomar en kuento.
Los Evropeos se topan delantre una mueva situasyon , tenemos un problema immedyato. El movimyento ke gano la eleksyon figura en la lista de las organizasyones terroristas... - (Deklarasyon echa vyernes 27 Enero)

Joseph Sitruk, Grande Rabbino de Fransya
Estos ombres ke fueron manipulados por una pretendida relijyozidad, los yamash "relijyozos".
Eyos no son relijyozos ,eyos son ekstremistos, eyos son personas ke desnaturalizan sus propya relijyon i ke justifikan sus violensa en utilizando el nombre del Dyo, lo ke es enteramente inakseptavle.
Komo todo el mundo i yo syento una profonda desepsyon, ma kreo ke komo syempre los Israelyanos van a reaksyonar komo se deve. La difikultad ke tyene el puevlo Judyo sovre la tyerra de Israel es  de no pueder syempre topar interlokutores kon los kualos dialogar.
Esto konvensido ke la vijilansya de Israel no se va afloshar. Tenemos syempre delantre de mozotros terroristos ke utilizan todos los medyos para parvenir a sus eskopos. Devemos de kedar prontos a defendermos. -(Deklarasyon echa Vyernes el 27 Enero)

Recep Tayyip Erdogan, Primer Ministro Turko
Devemos dar una shans al Hamas. No kale ke los prejuisyos le serren el kamino. Al avenir ,su kondukta puedra ser diferente de lo ke fue asta agora.
Asperamos de sus myembros ke se komporten kon un grande senso de sus responsavilidades i ke manifesten respekto por las valores demokratikas.
La kontinuasyon del prosedimyento en el eskopo de ayegar a la paz es mas importante ke todo. - (Deklarasyon echa el 26 Enero) 
 
John Howard, Primer ministro Australyano
La Australia no puede tener relasyones sinyifikativas kon un governo ke persiste a sostener las agresyones suisidaryas en Israel i la destruksyon del Estado Judyo.
Akseptamos el rezultado de las eleksyones Palestinyanas ma estimamos kel Hamas deve de su parte achetar ke no puede en mizmo tyempo "komportarse komo un Governo demokratikamente elijido" i de otra parte "sostener el terrorizmo". - (Vyernes el 27 Enero)
 
El Kuartet internasyonal pour el Orient Medyo
Esta Institusyon demanda al Hamas de renunsyar a la violensa i de rekonoser el derecho a la egzistensya de Israel.
Una solusyon ekitavle a este problema nesesita ke todos los partisipantes renunsyen a la violensa i al terrorizmo i aksepten el derecho a la egzistensya de Israel ansi kel dezarmamyento, komo lo presiza la "Oja de Enkaminamyento".
Ay una kontradiksyon fundamental entre la aktividad de milisyas i grupos armados i la konstruksyon de un estado.
El Kuartet internasyonal felisita el Prezidente Abbas i el Puevlo Palestinyano por el prosedimyento elektoral libre, ekitavle i seguro. - (Vyernes el 27 Enero)