Deke son los Djudyos İntelijentes?

Klara PERAHYAKaji kada dia en los grandes periodikos de los payizes evropeos son prezentes tres titolos: "Sharon ", "Kadima" , "Ehud Olmert" , kuando de otra parte , en una kamareta de ospital, un ombre lucha ainda por su vida despues kaji 15 dias de kompleta inkonsensya, un ombre solo delantre la muerte komo son todos los mortales, uno de los mas kritikados i en mizmo tyempo uno de los mas irremplasavles.

Judeo-Espanyol
9 Ocak 2008 Çarşamba

Dora NİYEGO

Un artikolo ke meldi el otro diya me entereso muncho i  kero partajar kon vozos mi plazer.  ‘Los djudyos son ekspertos del umorizmo porke eyos se ambezaron a riyir en tenyendo tantas razones de yorar’ esta dizyendo el selebre komedyano  Mel Brooks.
 En el mundo entero, ay aproksimativamente tredje milyones de djudyos, mas poko del "uno por syen" de la populasyon del mundo entero. Ma si miraj al interes  de la medya enverso los djudyos  i a los djudyos reushidos i selebres en el mundo, no vos puedej imajinar ke eyos son tanto pokos. Kada anyo kale ke ayga uno o doz djudyos ke ganan el Premyo  Nobel.
 En kada epoka, los mas grandes sientifikos fueron los djudyos. Marx, Freud, Einstein son solo unos kuantos entre eyos,  sus ideas trokaron el movimiento de las ideas de sus epokas.           
‘Eske  esto es solo una koensidensya?’ demanda Mel Brooks. Deke son los djudyos intelijente? ‘Yo vos puedo dar tres razones .
 La primera razon es "la Erensya". Los istoryanos endikaron una grande diferensya entre los Djudyos i los Kristyanos. En el Kristyanizmo, komo en las otras relijyones, los mas intelijentes  se izyeron lideres relijyozos ,.ma  dingun papaz no puedyendo kazarse, los Kristyanos, kon esta ley, serraron el kamino de la intelijensya ke es una kalita ke pasa kon eredita.
Par kontra los djudyos aplikaron el primer komandamyento de la Tora ke es ‘Te vas a multiplikar’. Sekso nunka fue konsiderado komo un pekado entre los djudyos. Eyos pensaron ke si sekso era un pekado, el Dyo no lo iva krear.
Komo en kada relijyon, i en el Judaizmo los mas intelijentes fueron enkorajados a ser lideres de relijyon. Syendo Rabinos, eyos deviyan de kazarsen i azersen ‘padres’ para formar  ‘modeles’ a los myembros de sus komunidades. Ansi, meoyos buenos pasaron de jenerasyon a jenerasyon i los djudyos dainda estan arrekojyendo el produkto de sus padres.
‘La sigunda razon es "el entorno’ esta dizyendo Mel Brooks. Los djudyos fueron el  puevlo ke tuvo menester de luchar lo mas muncho en la vida.  Los djudyos no tuvyeron dingun dirito de echarsen a durmir; eyos eran ovligados de ser mijor ke los otros.
"Si nases kon una kuchara de plata en la boka, te azes haragan; ma si nases kon un palo en la espalda, te ambezas presto a ser kapache i entendido en kada modo de koza, lo ke te va ayudar en la vida".
 Los djudyos , dize Mel Brooks, se engrandesen kon una kostumbre ke da grande importansa a la edukasyon . La edukasyon es konsiderada komo la mas grande obligasyon de la persona porke el Dyo kriyo  la persona a su imajen i el intelekto aze parte de esta imajen perfekta. Ser inyorente es un pekado kontra el Dyo.
La ley ovliga los djudyos a meldar la Biblia el anyo entero en divizandola en seksyones de kada semana. Al tyempo, una kreatura ke teniya tres anyos, kaliya ke se ambezara a eskrivir la alfabe ebrea en una tavla de myel. La kreatura se ambezava la alfabe en chupando la myel i egalizando la sinyifikasyon de las letras kon la savor de la dulsurya  .
Los djudyos meldaron el Midrash. El Midrash les ambezo ke el livro i la espada son venidos de Ganeden. El Dyo les disho: ‘Konserva lo ke esta eskrito en este Livro si no vaj a ser destruidos’.
Los djudyos meldaron la Mishna. La Mishna les disho: ‘No digaj  ‘kuando va tener tyempo para repozar?’.
El manyifiko karakter de Shalom Aleihem:"Tevye"en el livro ‘El Violonisto enriva el tejado’, esta dizyendo ke los djudyos se visten chapeyos porke eyos no saven kuando van a ser forsados de deshar sus patriya. Ma lo ke no disho "Tevye" es probablamente mas importante. Kale ke el djudyo tenga una koza debasho su chapeyo, aryento de su meoyo. El, syempre puede ser forsado de dar sus objektos materyales, ma lo ke esta akumulado en su meoyo va kedar komo la mas grande ‘merkansiya’ ke el  poseda.
Esto era la interpretasyon de Mel Brooks sovre la intelijensya de los djudyos  Mel Brooks no es  un komedyano ordinaryo!