Turkos i Djudios

Coya DELEVİLos Djudios de Palestina, un diya, dechidaron de embiar un regalo al Imperador Romano, sus soverano. Nahum Gamzu, ombre de grande fey, fue kargado de esta misyon. El regalo, un presyozo pesado de djoyadura, estava guadrado en una kashika manyifika.

Judeo-Espanyol
9 Ocak 2008 Çarşamba

El Sinyor Daniel Alkalay, orijinaryo de muestra komunidad, instalado desde kaji 60 anyos en Fransa (Vincennes), no se olvido ni se olvidara nunka de su Payis de nasimyento al kual kedo fuertemente atado espiritualmente.
Debasho de estas linyas vos transmetemos la eskrita ke el mos mando a la intisyon de muestros keridos lektores.
                           
                                                                                         Daniel ALKALAY

Yo so djudio Sefarad-Balkanik, nasi en 1920 en Estanbol en Turkiya, en la komuna de Haydar-Paşa.
Si oy, esto asentado delantre mi buro, eskriviyendo este artikolo, es grasiyas a un evenemento ke afito verso el anyo 1290. En este anyo, Osman I, fondador del Imperyo ottoman, desido  de eskojer la ley musulmana komo ley del estado.
Este fakto fue un byen muy favorable  para mosotros djudios Sefarad-Balkanik.
Si, al luguar de eskojer el İslam, Osman I eskojiya el Krisyanismo, komo lo izieron, los Turkos-Hüngarezes, i los Turkos-Fenladezes, muestro destino iva ser trokado.
Un otro grupo Turko, los Khazares fondaron un reynado en un teritoryo, ke oy es la Ukranya. Este reynado turo del anyo 660 fin el 1016. En el anyo 740, eyos eskojeron komo ley del estado: el Djudayizmo.
En Evropa, en los payizes Krisyanos, los Djudios eran maltratados, akuzados de "Deisid" (ke mataron el Dyo) , de trayer hazinuras i otras angusiyas.
En el anyo 1492, la Espanya estava aplikando de una manera muy fuerte la "Inkiziyion" ke kere dezir:" buchkar i eksterminar todo modo de persona ke no era katolika".
Los Djudios eran alora obligados, o de azersen Krisyanos, o si no, ser kemados bivos, o byen de salir de la Espanya. Muestros avuelos eskojeron eyos de kitar la Espanya,
kon el ayudo del Emperyo Ottoman, en la kavesa del kual reynava el Sultan Bayazid II.
Este sultan dyo el orden a los kapitanes de las naves turkas ke estavan en la mar Mediteranea, de arrekojer los Djudios ke estavan fuyendo la Espanya i de trayerlos en las grandes sivdades de los Balkanes komo Estambol, Izmir, Salonik, Filibe i otras.
El Sultan Bayazid, adresandose al rey d’Espanya le disho:
"El rey d’Espanya esta aziyendo un grande yero, en deshando salir de su payis los Djudios, este puevlo astusiyozo, enjeniyozo, savyo, ke era un elemento de rikeza i de prosperidad en su payis, i ke grasya al Djudio İsaac Abravanel, trezoriyero del reynado, aviya inchido las kashas del trezoro real, permetyendo a la Espanya de arrondjar los Arabos afuera. Este puevlo djudio ke va bivir en el Emperyo Ottoman, mos va trayer la prosperidad, el saver azer, i me esto gustando muncho."
Los djudios, es verdad, trusheron munchos aportos al Emperyo Ottoman, kozas presiyozas komo la emprimeriya, el lavoro del kuero de alta kualidad, donde los Djudios eran maestros i ke serviya sovre todo a la kavaleriya, topes (canons) mas perfomantes ke los ke se fabrikavan en la Bulgariya, i una koza muy presiyoza, eyos aplikaron en el emperyo " la banka" . Ansi era mas kolay de embiyar paras de una sivdad a la otra.
Los sultanes no permetiyan "dengun akto kontra los Djudios" de la parte del puevlo. En 1700 el Sultan Ahmed III, kito una ley, ke kondanava, de tener la kavesa kortada, el ke se permeteriya de tokar el "kaveyo" de un djudio…
En 1570, un Djudio Sefarad del portugal, Jozef Nasi, muy riko merkader, era muy estimado por el Sultan Selim II, i para remersiyarlo de todo el oro ke traiya al trezoro emperial, le dyo en regalo la Isla de Naxos, la mas grande isla de las "Cyclades" teniyendo 450 km2, i una populasyon de 15.000 personas. A esta okazyon Jozef Nasi se izo yamar "Duc de Naxos" (Duk de Naksos).
El aziya komercho, entre otros, kon la Fransya. Un diya el Governo Fransez, debasho el reyno de "Charles IX" desido de no pagar la devda ke teniya enverso  Jozef Nasi,
el kual se kesho al Sultan Selim II, ke dyo orden a todos los portos turkos en la Mediteranea de no deshar akostar denguna nave Franseza.
El komercho Fransez sufriyo muncho de este karar i la Fransya fue ovligada de pagar a Jozef Nasi todo lo ke le devia.
Es ansi ke se pasavan los aktos de amistad entre los Djudİos i las Otoridades del İmperyo Ottomano.
Desde 1492 fista oy, mozotros Djudİos Sefarades Balkanik bivimos un tyempo de paz i de totoleransya en Turkia.
El antisemitizmo egziste oy en dia en todos los payizes del mundo… ma no en Turkia.
Mozotros Djudİos Sefarades Balkanik no puedemos i no devemos nunka olvidarmos esto. Si no seriamos ingratos.