En el korso del viaje, se kedo en una pozada (han). El balabay i su mujer, personas malonestas, avyeron la kashika, arrovaron lo de aryento i la incheron de tyerra. A la demanyana, Nahum se apersivyo del rovo, i pronunso las palavras ke uzava dezir en situasyones difisil :"GAMZU LE TOBHAH, por byen sera ".i asperando algun nes, kontinuo su kamino verso Roma.
Arrivando ayi, lo yevaron delantre el Monarko , le dyo la kashika, djuntos una letra, ande los Djudios le rogavan de achetar el regalo en sinyo de sus fidelidad. El Imperador avyo la maraviyoza kashika, i grande fue su enkanto de verla yena de tyerra. Naturalmente penso ke los Djudios se estavan burlando kon el. En grande sanya, ordeno la eksterminasyon del puevlo ke aviya ozado a embiar esto.
Nahum, afilu en esta situasyon trajika, no manko de dezir sus byervos konsolantes:"Todo sera por byen".Alora, el PROFETA ELIAU, vestido komo uno de los dinyitaryos (saray erkanı) del palasyo, aparesyo delantre el Imperador i le disho:
"Majeste, no vos inyervesh tan presto kontra los Djudios. Devemos egzaminar si esta tyerra poseda alguna vertud SEKRETA. Puede ser la tyerra ke el PATRIARKA AVRAM AVINU tomava endjuntos en gerreando. Grasyas a esta tyerra, el syempre fue gloriozo. El Monarko acheto de provar a kondisyon de tener Nahum en prezo.
Akeya epoka, los Romanos estavan gerreando kontra una armada fuerte, sin reushir a venserla. El Imperador mando la tyerra de Nahum a su jeneral, ordenando de echarla ensima del enemigo. El mirakolo se realizo i los Romanos ganaron una briyante viktorya.El Rey izo venir Nahum, lo felisito, lo rengrasyo el, i la nasyon Djudia, le izo onores. Ordeno de inchir kon diamantes i perlas la kashika ke aviya kontenido la famoza tyerra.
Nahum, en el kamino de retorno,se kedo delantre de la pozada, ande le aviyan arrovado la djoya. Rengrasyo los ladrones dizyendo:" La tyerra ke inchitesh al lugar de lo ke me arrovatesh, me trusho rikezas i onores." Esta djente ojo vaziyo ( tamahkar ), dechidaron de seguir el egzempyo del Djudio, i arrekojyendo una grande kantidad de la mezma tyerra, la yevaron a Roma kon la esperansa de obtener rikezas.
"Majeste", disheron," te trushimos de la tyerra mirakoloza, kon kuala , sintimos, ke vensites tus enemigos." El Monarko, kontente de este regalo, ordeno portanto, de tener en prenda ( rehin ),los mesajeros, asta provar i ver el rezultado. Naturalmente, nada de ekstraordinaryo akontesyo. El Imperador ordeno una investigasyon sovre el orijen de la famoza tyerra,traida por Nahum. Fue alora, ke marido i mujer se ovligaron a konfesar el rovo.
El Imperador, dyo orden de kastigar (cezalandırmak ) de negra manera, estas personas ke aviyan kometido un grande krimen kontra los Djudios.
Manadero: Contes et Lejendes d’Israel.
Tomado del Talmud
