Multiplisidad i varyedad kultural

20 Kasım 2005 Pazar günü Limmud Kültür Festivali gerçekleşti. Gazetemizden genişçe bir ekibin katıldığı günden izlenimleri Viktor Kuzu, Tuna Saylağ, Batya Kebudi, David Ojalvo ve Hay Eytan Yanarocak`ın yazılarıyla sunuyoruz

Judeo-Espanyol
9 Ocak 2008 Çarşamba

Dos elementos de baza en la sivilizasyon de un payis i de una komunidad 

Klara PERAHYA

Afuera de todo modo de konsiderasyon ekonomika o politika, muestro payis (i en mizmo tyempo, proporsyonalmente muestra komunidad tambyen)  estan bivyendo desde unos kuantos anyos, un periodo desizivo de sus Vida Kultural,  "una ermoza avyertura verso kulturas i artes diferentes de las suyas", "un  refuzo de todo modo de sektarizmo i  fanatizmo".
En muestro payis, estas de al kavo  semanas: el kongreso anual de Filozofia Internasyonal, interkambyo de konseptos i ideas .. multiples konferensyas literaryas , publikasyon de livros, i artikolos al mas alto nivel...  traduksyones de ovras internasyonales ... konsertos de todo modo de muzika, klasika komo folklorika, medyeval  komo moderna, oriental komo oksidental ... ekspozisyones de ovras de grandes pintores Turkos ansi ke estranjeros komo aktualmente la egzibisyon de las pinturas de Picaso, ets...ets.....
En muestra komunidad en el Schneidertempel, retrospektiva de 50 anyos de lavoro piktural de Esty Saul , en otra galeria  egzibisyon de tablos de Robert Baruh... estilos diferentes, metodas diferentes... temas diferentes...  los unos figurativos asta el mas chiko detalyo, los otros abstraktos ...un enfloresimyento polivalente  de ovras kada una kon su propya signifikasyon o su propyo mensaje.
En el "Instituto Italiano de Cultura" grasyas al ermozo esprito de hospitalidad  de su Direktor, dos nochadas fantastikas de muzika:
Myerkoles el 16/11/2005, debasho el patronaje del Konsolo de Israel "Mordehai Amihal" i de la Delegada kultural "Batia Keinan": konserto de "Mueva Muzika tradisyonal" nombrada HAWA. Sinko muzisyanos de payizes diferentes: Yinon Muallem de Israel, Mohamed Alnuna de Irak, Zhubin Kalhor de Iran, Sujat Dev de Indya i Izzet Kizil de Turkia... un  regalo para los oidos de los amatores de muzika oriental..
Shabat  la noche el 19/11/2005: Enkontro de Kulturas de tres payizes: " Israel"- "Italya"- "Turkia"  kon la presyoza kolavorasyon de los partisipantes: Miriam Meghnagi de Italya,  Ruth Yaakov de Israel,  Muammer Ketencoğlu, Sumru Ağıryürüyen, Aytunç Matracı, Rahmi Göçmen de Turkia. La grande sala del "Istituto Italiano di Cultura" estava yena  asta tener una multitud de personas en pyez .
Al prinsipyo del konserto la boz kayente i grave, vibrante de una intensa emosyon de Miriam Meghnani ke mos dyo kantes İtalyanos i en mizmo tyempo kantes del repertoryo Sefardi i ashkenazi,  Ruth Yaakov ke kanto kon muncha sensivilidad i una otentisidad absoluta, i enfin el Grupo "Muammer Ketencoğlu" ke el mos dyo la muzika Makedonyana, Yugoslava, Grega. Una maraviyoza diversidad i una egzekusyon perfekta . En la sala el entuzyazmo fue unanimo.
Alhad el 20 Novembre "LİMMUD", un  dia de kultura , un dia de diskusyones rikas en refleksyones, un dia ke aze onor a muestra komunidad i al kual partisiparon nombrozos de muestros intelektuales  ansi ke nombrozos pensadores estranjeros.
A este sujeto Karen Gerşon Şarhon mos dize lo sigyente:
“El 20 de Novembre 2005, tuvo lugar en la eskola djudia de Estambol, "Limmud Turkiya"; un dia entero de ambezamiento sovre todos los sujetos djudios.  La palavra "limmud" kere dizir "ambezar", i la organizasyon Limmud da la oportunidad de ambezar en el sensio ancho de la palavra, ambezar kozas diferentes.
La organizasyon Limmud fue kreada por un grupo de mansevos voluntaryos en Ingletierra por la primera vez antes 25 anyos.  El anyo pasado un grupo de Turkiya fue invitado a Nottingham para partisipar a los evenimientos ke duraron kaji una semana.  Dias enteros de konferensias, sesiones de arte, muzika, relijion, kurto un monton de sujetos ofresidos a los partisipantes para ke se ambezen kozas muevas o ke se adelanten en kozas ke ya estudiaron.  Fuimos tanto enkantados kon la organizasyon ke asigun tornimos la vise presidente de muestra komunidad Lina Filiba empeso a mirar un modo de azer una koza paresida en Estambol.  Eya enkaveso un grupo de voluntaryos ke se metieron a lavorar para realizar este projeto i despues de aver lavorado kaji un anyo el dia del 20 Novembre arivo.
Mas de 60 konferansieros/profesores/rabinos/artistas/kantantes/terapistas/bailadores se aunaron para krear este dia de ambezamiento sovre toda koza djudaika, de arte a muzika, de politika a filozofia, de temas relijiozas a temas literarias, de medisina a karikatura, de folklor a skulptura, todo se aparejo i se prezento para los 700 partisipantes, lo mas mansevos, ke vinieron a pasar un dia de ambezamiento.  Uvo 20 sesiones en kada de las 5 oras, kere dizir ke uvo kaji 100 prezentasiones, i por esto los partisipantes tuvieron de eskojer las sesiones onde se kerian ir.
La organizasyon fue ekselente, las komidas no se kere dicho la ermozura (en esto depasimos las de Ingletierra mil vezes!), i la djente orozos i gustozos.  Todos se estavan riendo i engleneandosen.
Kale felisitar de todo muestro korason el komite de organizasyon por el echo ke izieron.  Esperamos kontinuar estos dias de ambezamiento en kada anyo porke pudiemos asistir solo a 5 de las 100 sesiones.  Dainda tenemos munchas kozas para ambezar...” (fin de sitasyon)
En unos kuantos dias (del 28 Novembre  al 1 Desembre la tadre) el "Primer enkontro Historiko-Kultural Hispano-Turko-Sefardi" organizado por la "ASOCİASYON CULTURAL I DE AMİSTAD IBERO-AMERİCANA" kon la kolavorasyon de la "Embashada de Espanya en Ankara", la "Universidad de Ankara" i el "Instituto Cervantes"  de Estambol.
Partisiparan numerozos Profesores de diversos payizes, de Turkia, Espanya, Israel, Fransya, Almanya, Estados Unidos i tambyen myembros de muestra komunidad.
“Akseptar el Otro en todo lo ke lo desferensya de mozotros" no es un renyegamyento de si mizmo, ma al kontraryo, un esforso de komprensyon ke afirma muestra maturidad.