Doz Personajes Selebros de la Famiya Nasi

Coya DELEVİ

(1*)-La famiya NASİ, es una de las importantes famiyas en la Historia de İsrael. Posedavan una fortuna konsideravle i teniyan relasyones de amistad kon los soverenos Evropeos de la epoka. Okuparon importantes postos en el palasyo Otomano, projetaron de fondar una kolonia otonoma (özerk) en las tyerras Djudias.
Este artikolo es en una manera, la kontinuasyon del ke eskrivi sovre los Maranos del Portugal. Los Nasi eran una famiya de Maranos refujiados en este pais, despues de la ekspulsyon de la Espanya, en 1492. GRASİA NASİ, ( Beatris de Luna, kon su nombre Kristiyano), su sovrino JOZEF NASİ( Joao Miguez), fueron unas de las mas grandes figuras del Djudaismo. SAMUEL  NASİ (Agostino), padre de Jozef,era profesor mediko en la Universita de Lisbona. i,  REİNA, (Brianda)son ermano i ermana de Grasia. Nasi.
Los Nasi, en publiko biviyan komo Kristiyanos, todo en konservando, en sekreto, sus fey DJUDİA. Seya en Portugal, seya en los otros paises, ande emigraron despues de la İnkizisyon Portugeza en 1536, la famiya, en tal ke Maranos sufrieron bastante.Aki kero transferar una fraza del eskrivano Felipe Torroba B.De. Quiros, ( 2*) "En Portugal, los refujyados Djudioa de la Espanya, fueron arresividos kon deskonfiensa, i forsados a konvsrtirsen al Kristiyanismo. Los ke no achetaron esto, ekspulsados. Estos se refujyaron en HOLLANDA.’’
La vida de Grasia Nasi es una kaskada de evenimyentos ke se eskrivyeron en la Historia del Djudaismo.Nasida en Portugal, en 1510, de una famiya rika de Maranos.Teniya solo 15 anyos kuando muryo su ermano Samuel, i tomo la responsabilidad de la famiya entera.(Jozef era aedado de 10 anyos)
En 1528, kazo kon FRANSİSKO  MENDEZ, riko bankyer, tenyendo negosios i en ANVERS, dirijados por su ermano DİEGO  MENDEZ. En 1531 nasyo REİNA, la ija de Grasia.En 1536 muryo Fransisko ke fue forsadamente (mecburen) enterrado kon seremonia Katolika, en Lisbona.
Mezmo anyo, en Portugal, empeso la İnkizisyon. La famiya Nasi abandono el pais pasaron en primero a Londra, a Anvers, ande Brianda ( Reina ), kazo kon  Diego  Mendez i tuvyeron una ija, Grasia  LA CHİKA. En Anvers, Grasia i Diego, ayudaron los Maranos del Portugal a  fuir de ayi…
A la muerte de Diego, en 1542, Grasia tomo la administrasyon de todas las finansas de la famiya. A su sovrino Jozef, alora de 22 anyos, lo vamos a ver entonses mano kon mano, lado kon lado kon su Tiya  Grasia. En 1544, tuvyeron a rezistir a syertas presyones ( baskı ) de la parte de los novles Evropeos.( 3*)- Fueron akulpados de ayudar, de protejar en sekreto los Djudios, i de konservar sus identitad Djudia. Alora, las damas, kon el preteksto de kurarsen, se fueron a Aix-La-Chapelle, una estasyon termal, i. de ayi, a Venezia…Jozef, de Anvers, despues de aver reushido a transferar los negosios a otros diversos paises, se adjunto al resto de la famiya en Venezia.
Brianda, en 1547, denunsyo Grasia, kon el preteksto de ser pratikante del Djudaismo.Ma en realidad era kestyon de erensya. Grasia fue metida en prezo,sus byenes konfiskados. Reina tambyen tuvo la mezma suerte.Las kriaturas fueron embiyadas a un konvento.
Jozef Nasi, en 1549, demando al  SULTAN SULEYMAN EL  MANYİFİKO,( Kanuni ) la otorizasyon de refujyo. Empleando su fuersa diplomatika, reusho a liberar sus tiyas i la fortuna de la famiya. Grasia, pasando a FERRARA,se rekonsilyo kon su ermana. En Ferrara, kon su reel identitad de Djudia i en tal ke DONA GRASİA, (1550), dyo grande ayudo i apoyo a los emigrantes Maranos. Estuvo syempre prezente en las reunyones de las komunidades Djudias. Kon su grande kontribusyon            (katkı), se treslado la BİBLİA EBREA en Espanyol.
La famiya Nasi, no keryendo mas kedar en la atmosfera de intolerensya ke se estava desvelapando en la Evropa, se transfero a  Constantinople ( Estambol ).en 1553. Jozef  Nasi kazo kon Reina la Chika. Grasia syempre se entereso al triste estado de los Maranos de Evropa, gerreo kontra la İNKİZİSYON. Kon la intervansyon del Sultan, syertos Konversos, aprezados en ANCONA, fueron liberados, embiyados a las tyerras Otomanas ( 1556 ).Otros fueron egzekutidos kon el orden del Papa Paul IV.En protesto, Dona Grasia, deklaro ambargo al porte de Ancona.
En 1560, ( 1563, asegun syertos ) Jozef fue nombrado governador de TİBERİAS. Empeso a la produksyon de lana i seda. Unos afirman ke su buto era politik, su dezeo i ideal, fondar una kolonia Djudia. Tuvo relasyones de amistad kon el  PRENS  SELİM, ke paso al trono komo  SELİM III, i le dyo en 1566, a Jozef, el titolo de DUKE  DE  NAKSOS.
Dona  Grasia se instalo en Tiberias, kontribuo a la prosperidad del komerso de lanas i otros, fondyo una Akademia. Su muerte en 1569, kavzo una immensa pena en las komunidades Djudias. Ayudo los Konversos fuyendo de la İnkizisyon, sus korrelijyoneros de la Evropa. Fondyo eskolas i sinagogas en sivdades Otomanas. Reusho a traer el puerpo de su marido i enterrarlo en Palestina. En las sinagogas, syempre alavada, fue komparada a las eroinas Biblikas.           
Jozef  Nasi muryo en 1579. El fue konsiderado komo un espesyalisto de la diplomasia, la finansa i un konsejero en estos domenos. ABBA  EBAN, en rezumando la vida Jozef Nasi dize: (4*)   -"Kale achetar ke el proyekto de Tiberias, es uno de los proyektos de retornar de muevo a la patria. Un pionaryo (öncü) del plano ke van a aplikar los Djudios del XIX. Siglo "

(1*) (4*)-Moshe Sevilla Sharon –TÜRKİYE  YAHUDİLERİ
(2*)-Felipe Torroba B.De Quiros-THE  SPANİSH  JEWS
(3*)-Esto es muy largo i komplikado,difisil de transmeter aki.