El kuadro era enkantador, sovre las aguas del Bosforo, de una parte las siluetas de las grandes Djamis, de la otra la kosta Asyatika.... el sujeto de la emisyon previzivle, la kestyon del dia, la entrada de la Turkia a la Unyon Evropea.
Komo lo disho uno de los partisipantes estranjeros, el fakto de pueder diskutir publikamente de un sujeto tan importante para la Turkia, en un semejante lugar, sin ningun impedimyento, es (a el solo) la prova del alto nivel demokratiko de este payis.
Los primeros pasos echos la semana pasada en vista de empesar las negosyasyones en este buto, fue si no me yerro el sujeto el mas diskutido en la prensa universal. Por la primera vez desde siglos el Oriente i el Oksidente seran unidos ofisyalmente en un mizmo Proyekto i una mizma Akseptasyon mutual.
Syertos komentadores fueron muy optimistikos, otros negativos, ma kuala ke sea la opinyon jeneral, i tambyen kuala ke sea la largor del tyempo ke mos separa de la konkluzyon definitiva, la desizyon del 3 Oktobre de "la Komunidad Evropea" fue una akto politiko- kultural muy pozitivo, no solo para muestro payiz, ma tambyen para la Komunidad Evropea eya mizma, la kuala tyene komo eskopo primordyal de asegurar la Paz i lo mas posivle de Justisya i de Igualidad.
En este kavzo, no se trata de la fuzyon de dos sivilizasyones diferentes...No ay diferentes Sivilizasyones. La sivilizasyon es una, unika en todo lo ke eya komporta no solo de progreso tekniko, ma sovre todo de veluntad de komprensyon del otro ..İ para ayegar a este punto, es antes de todo nesesaryo de saver salir del chiko espasyo ande kada uno se topa enserrado i de tener la onestedad de aserkar de este Otro sin prejuisyo.
El benefisyo sera resiproko en estas traktasyons, la Turkia tyene por seguro muncho a ganar de esta Unyon. ma tambyen la Komunidad Evropea, a su torno, tyene nombrozas kozas a ambezarse del Turko, partikularmente su sensivilidad i su ospitalidad... su maraviyoza avyertura al estranjero i su kayentor afektiva ke no le permete nunka de kedar indiferente delantre un ombre o una mujer en el apreto.
La komunidad Evropea i la Turkia, dos entidades kada una kon sus partikularidades, Si, ma ke se kompletaran la una la otra. Ay en la fuzyon de las diversidades una rikeza ke malorozamente no realizaron ainda munchos dirijentes Evropeos.
