Fue imposivle para mi de sigir el programa en su totalidad, ma no manki ni la entrevista de Frederic Mitterrand kon İshak Alaton, ni el filmo sovre la Turkia ke fue echo en Fransya en kolavorasyon kon İlana Navaro.
En todas las dos realizasyones topi una grande klaredad i una objektividad kaji absoluta...nada fue egzajerad’o, nad’a fue deshad’o en la solombra. Personalmente resenti una fuerte impresyon de voluntad de otentisidad en oyendo los nombrozos dialogos de las dos produksyones.
İshak Alaton avlo del immenso progreso de la Turkia tanto en el kampo ekonomiko ke sosyal, i sovre todo de la evolusyon industrial i de los numerozos proyektos en korso de realizasyon.
El insistyo sovre la perfekta kondisyon de vida de las minoridades en Turkia.
Tambyen komo mo lo raporta la Gazeta Hürriyet, el djurnalisto Ermeni Hrant Dink disho lo siguiente: "....La Evropa i la Amerika estan utilizando el problema Ermeni komo materyal a suz avantaje politiko i ansi estan azyendo danyo i a los Turkos i a los Ermenis. Agora no se trata de akseptar o no el evenemento, agora es el tyempo de entender".
Todo esto, salvo syertos evenementos pasajeros, es la realidad.
Vinyendo a la realizasyon sinematografika a la kuala partisipo İlana Navaro, este filmo kontyene inkontestavlemente una teknika impekavle... vistas panoramikas del Este de la Turkia reelmente ekstraordinaryas, a un syerto momento vemos el lako de Van , mas dospues, en un espasyo dezyerto una eglisya Ermenia... En syertas shenas ,siluetas de mujeres, siluetas de ombres kualos pensativles, kualos konfientes... dialogos kompaktos ande munchas kozas fueron dichas... sufriensas sovre las fachas ma tambyen esperansas...
Segun lo ke eskrive la gazeta Hürriyet syertos pasajes de este filmo provokaron reaksyones en una partida de los ke lo vyeron, eyos sintyeron en chikos dialogos komo una propaganda negativa en defavor del payis.
En todo kavzo, el immenso lavoro ke mos fue prezentado Alhad, reflekta la Turkia moderna i en mizmo tyempo la Turkia profunda, kon sus inombravles problemas, su pasado somptuozo ma a syertos momentos muy dolorozo, su immenso esforso de adelantamyento, la grandor de su salvador Atatürk i la voluntad de sus diversos governadores de estar en una dinamika konstante de sivilizasyon i de progreso.
