Klara PERAHYALa semana pasada muestra komunidad fue onorada por la prezensya del Prof. Jimmy Weinblatt rektor de la Universidad Ben Gurion de Beersheva, kon el kual (grasyas al kudyo de la Profesora Tamar Alexander) tuve el privilejyo de tener una entrevista..
...Septembre Djugevez…"Amanyana, en BARIN YURT, organizimos komida de noche Shabbat para el grupo ke vino de Israel. Keremos vervos a ti i tu marido .."Esto fue la envitasyon ke me izo Karen Gerşon Şarhon. Era imposivle de no achetar. Una okazyon de konoser djente mueva…
Coya DELEVİ
Una Semana de Aktividad i
Muevas Eksperyensas
Se trata del grupo de los 24 elevos de la Universidad Ben Gurion, sentro Moshe David Gaon, de Kultura Djudia –Espanyola. Estos mansevos i mansevas vinyeron a Estambol, enkavesados por el Rektor Prof. Jimmy Weinblatt, la Prof. Tamar Alexander i el Dr. Eliezer Papo. Son dirijentes i ensenyantes de la sovredicha Universidad. El buto de este viaje es de asistir a los korsos de Ladino, i konoser la sivdad.
Noche Shabbat, fuimos los primeros a arrivar a Barin Yurt, sinyo de mi despasensya. Suvimos a la tarasa ke tyene un panorama inkomparavle, ma no enteramente ajeno para mi. De la ventana del apartamento de Galata ,ande pasi mi chikez, ya admiravamos una partida de esta vista. En entrando a la tarasa, la primera koza ke me travo la atansyon, fue el pranso ordenado kon muncho gusto i lavoro metikulozo (titiz).
Achakes del asansor reglado al sistema de Shabbat, tomo un syerto tyempo el arrivo de todos los kombidados. Karen, kon su kara sonriente abitual, me prezento a los professores ke nombri en el primer paragrafo. Solamente ,no me impedi de dezir al Dr. Papo" Pensava renkontrar un nikochiri, ma salites de la edad de mi inyeto!".A kualo se rieron…
Efektivamente,es un mansevo de 33 anyos ( notisia: mi inyeto tyene 23 !), El Sr. Papo es orijinaryo de Sarayevo ( Saray Bosna ), avlando el Ladino komo mozotros.Es en mezmo tyempo, rabino i mos meldo el KIDDUSH. Fue un pranso muy alegre i las komidas delisiozas.
Entervalo de 2 puntos la tarasa se transformo en una miniatura Torre De Babel! (Babil Kulesi)
No se avlo 72 linguas, ma a lo menos 5 o 6 ::Ivrit, Ladino, Inglez, Turko, Fransez i afilu me parese ke oyi i el Ruso..A mi derecha, tuve un mansevo Djudio, bivyendo en Paris. Izimos en Fransez, una konversasyon muy instruktiva ,syendo ke es jurnalisto i aze filmos dokumentaryos sovre los Djudios.
A un syerto momento, doz muchachas simpatikas Hen I Evgenia ( imigrada de Rusia ),se aserkaron de mi ,demandandome un reportaje !A mi enkanto, me eksplikaron ke estan preparando una teza de master sovre las tradisyones i uzos en los kazamyentos de las komunidades Sefaradis de Turkiya. Se informaron ke yo so kapavle de ayudarles…
Myentres ke estavamos avlando, vinyeron Sima i Elad, eyos tambyen kon una rekuesta semejante ,ma sujeto diferente: selebrasyones- tradisyones sefaradis en Pessah..Por un momento, kedi sin avlar I dishe de mi para mi:"Coya, no agas panik! Por seguro ay un yerro. Sin duda, les esta paresyendo ke so alguna profesora!"
Ma no aviya yerro, i mi panik se transformo en kontentes, kuando entendi ke la kerida Karen, les aviya dicho ke yo era la djusta persona para ayudarles..Fuir de esta misyon, refuzar iva ser kobardiza ( korkaklik) de mi parte.
Finalmente, myerkolez demanyana, a las 09.00, mos rekojimos de muevo en Barın Yurt. Kon alternansa de grupos, reushi a lavorar kon todos durante kaji tres oras. Yo me fui un poko akavidada, apareji syertos tekstos , ize bushkidades. Komo se iva avlar solo en Inglez, lo estava reselando un poko. No puedo pretender konoserlo tan bueno, komo el Turko i el Fransez. Ma todo fue perfekto,lo ke avlimos se tomo al teyp , mos travimos fotos ets..
Del presipyo yo pensi ke iva ser una semanada enteresante I fruktuoza , i ansi fue…
