İzel Rozental koordinador en Estambol del diya Evropeo de la kultura Judia en kolavorasyon kon el komite del Schneidertempel, syempre dinamiko i imajinativo en su lavoro artistiko-kultural, organizo una muy interesante ekspozisyon de fotografias echas por Jak Belman, fotografo byen konosido i muy apresyado, testigo desde largos anyos de kaji todos los akontesimyentos orozos komo malorozos de muestra komunidad, ke el observo i fikso por syempre kon su kamera..
Esta ekspozisyon konstitue un djenero de chika arshiva ke relata, mizmo si es parsyalmente, la vida de muestra kolektividad durante una syerta epoka del pasado. Munchos de los vijitadores se toparan en estas fotografias i munchos evenementos enterrados en el olvido suviran asta muestra memorya.
La dicha ekspozisyon kedara avyerta una semana.
