Klara PERAHYANo se reelmente si es una ventura o un terrivle desmazalamyento de bivir en muestra epoka, una epoka ande lo bueno i lo negro, la klaredad i las tinyevlas, el progreso i el oskurantizmo son a este grado prezentes, kaji apegados los unos a los otros.
El pasar de la mansevez a le vejes es tan avagarozo, ke jeneralmente no mos rendemas kuento. Es komo el otonyo, kon las manchas amariyas o ruvyos ensima las ojas de los arvoles, tomando el lugar del enverano, antes de empesar su viaje verso el invyerno…
ENTRANDO EN ANYOS… O ENVEJESER
En el presipyo del mez de Septembre, se selebra el diya de los "Avuelos". Malgrado lo ke desha prezumir este byervo, todos los grande paryentes no son aedados. A la kontra, ay ke se pueden dezir komo ermanos grandes de sus ijos. Mansevos o menos mansevos, a todos los avuelos les mando mi amistad a la okazyon de este diya.
Komo las ojas, i el ombre empesa kon un poko de grizo en los syenes (şakak), rugas, kanseryas, rememorar el pasado, olvidar, akodrar… Envejeser es bivir esta dilemna, i alora le puedemos suetar la bienvenida!…
En realidad, es el ritmo natural de la vida, la ultima etapa de la egzistensya normal del benadam. En lenguaje profesyonal es, en un senso jeneral, el amenguar de las aktividades fizikas I psikolojikas de la persona. Asegun la medikeria, esto empesa verso los trento –inkreivle!- Portanto es ansi. Las selulas, poko a poko, pyedren la partikolaridad de renovarsen, lo ke puja el riziko de hazinuras, syendo ke el organismo devyene menos rezistente de anyo en anyo, de diferentes maneras…
Dizen ke 50 anyos es un viraje, un paso a la vejes. Todo en admetyendo ke es un virave, no puedo achetar la idea de vejes. Asegun mi, es el empesijo de sezudeza, de arresentamyento –para unos!…- De syerto, en vezes sentimos komo un albon, un chiko reselo de konstalar syertas kozas, o la vida eya propia, ke se esta arresvalando entre las manos…
Ya se save, ke munchos problemas psikolojikos, en diversos kavzas, son los manaderos (kaynak) de dezrepozos organikos. Alora, si es la sanedad ke importa, pensaremos a no envejeser psikolojikamente para aparejar una vejes sana. Naturalmente, no es posivle de impedir los anyos de pasar. Oy, la medikeria preventiva (önleyici tıp) i protektrisa (koruyucu)- realizo grande evolusyones, entre kualas el Anti-Aging.
Es posivle de kedar un vyejo monsevo? Kestyon alakuala va responder el Prof. Osman Müftüoğlu: "Si no tenesh alguna okupasyon la vejes devyene una negra uzansa. Mezmo en entrando en anyos o mas egzaktamente, en envejesyendo, phuedesh okuparvos, produizir syertas kozas i kedar ansi mansevo, empesar kada muevo diya kon una mueva enerjia".
Syempre se puede topar okupasyones, apartar mas muncho tyempo a las inyetos, sin portanto olvidar la diferensya de jenerasyon, sin enfasyarlos. Se puede eskrivir los rekodros, meldar, pintar si tenesh talento i azer munchas otras kozas, komo kurtos viajes, deskuvrir las ermozuras de la natura ets… En kurto, okupasyones en la mezura de las posivilidades. No kale ser enganchadas al pasado i a sus problemas. Enfin, mirar kon un ojo optimsto a la vida, son los primeros pasos…
Un grande reselo de los aedados es bivir leshos de los ijos. En munchas komunidades, espesyalmente en las agrikolas, los vyejos tyenen una alta pozisyon de konsiderasyon achakes de sus eksperyensas presyozas i biven syempre kon el resto de la famiya. En las komunitas modernas, se esta preferando la chika unidad familyal ke se yama "Çekirdek Aile". Dunke los aedados estan mas o menos aleshados. Par konsekuensa, mezmo en no bivyendo debasho del mezmo techo, estan perkurando a morar lo mas serka posivle, lo ke les esta dando un sentimyento de seguridad.
Keridos lektores i amigos, despues de esto todo no ay dinguna razon por no empesar al viaje de una vejes sana i oroza…
50 Anyos…
Sinkuenta anyos, medio siglo,
En este pasyonante kamino,
Kamino ke se yama vida,
Tu no vites nada, dayinda…
Es un importante viraje,
Estos anyos, no olvides.
İ en este maraviyozo viaje,
Ay flores, ay punchones.
Komo en todo bagaje,
Ay kerensyas i pasyones…
Coya Delevi
Estambol 2004
