En Fransez ay una ekspresyon ansi formulada: "L’heure de Vérité" (en Turko "Eşref Saatı)
Lo ke kere dizir "El momento de la Verdad".
Es un momento ande la emosyon trae lagrimas a los ojos, sin saver por kualo.
"El momente de verdad" es el momento onde la persona syente, al profondo de si mizmo,la ermozura i la verdad pura, sin ninguna mancha. Por egzempyo, kuando el sol espunta en la madrugada o byen se unde la tadre en las profonduras de las mares, kuando mos topamos delantre un tablo de Rembrandt o un poema de Ibn Gabirol o byen kuando oyimos un preludyo de Bach i otras maraviyas semejantes.
Ansi, fue para mi "un Momento de Verdar" de ver al entorno de una larga meza profesores vinidos de las kuatro partes del mundo, diskutyendo kon la mas grande modestia de valores universales , las kualas son la baza de la Umanidad.
El ombre no bive solo de pan i agua.....
