La Ventana de Vuestra Ermana

Şeli GAON
Muestra felisidad (mutluluk) esta en lo ke posedamos. No kale keşarmos, kuando no topamos una komida ke mos plaze en muestro çini. Kale pensar a las personas ke no topan nada para komer i artarsen en sus mezas. Kuando estamos en el kamino i el trafik esta terible ke mo se apreta el korason, no mos inyervaremos ke estamos peryendo tyempo en el kamino. En este momento pensaremos a las personas ke no tuvyeron nunka el mazal de suvirsen a un otomobil en sus vidas. Kuando los eços no estan muy buenos i ay problemas, no mos demoralizaremos, i pensaremos a las personas ke keren lavorar i no estan topando un lavoro.
Kale saver riyir mizmo; enfrente de la duresa de las personas, de la endiferensya, de la deskonfiensa (güvenilmezlik), i no kale ser duro i, endiferente. Esto todo son kozas çikas para estar mas orozos en la vida. Lo mas emportante es de pueder mirar a la vida i a todo modo de kozas kon kerensya. Tanto estamoz koryendo entrel diya, ke no mos estamos rendyendo kuento de las oras ke estan pasando komo agua. Kontinualmente estamos en un asigo para pueder alkansar a lo ke keremos azer, ma el tyempo no mos esta abastando. Esto mirando a mi entorno ke la kerensya i la amistad entre las personas se esta aminguando de diya en diya. Todos estamos koryendo, tanto keremos azer todo kon prestor ke no mos esta kedando tyempo para bivir. Yo penso ke; lo mas emportante es de ser aunados todos los cudyos, dar mano kon mano i venser las difikultades, ayudar a los ke tyenen menester, i no kontraryar a los kapos de muestra komunitad, para ke pueden lavorar kon repozo.
Komo kada humano esto es la mas grande ayuda de muestra parte. Rekoneser a todos ke estan lavorando en todo modo de ovras, porke la epoka ke estamos bivyendo esta muy difisil. Personas sin eços, universitaryos ke keren lavorar i no estan topando lo ke keren.... Malorosamente, muestra komunitad se esta envejesyendo de diya en diya, i ay munças problemas en todo modo de kaza.
Los eços non briyantes, las hazinuras pujando.... Ken va akudir a estos membros? La ayuda de kada uno de mozotros, i la buena intisyon va ser la salvasyon......