Djueves pasado,todos endjuntos, ombres i mujeres, dishimos el Kadish en memorya de Rav David Asseo (

Klara PERAHYA
Djueves pasado el 11 de agosto, a las oras 13,30, malgrado el sol kemador i la  atmosfera empapushada de umidita  kaji irrespiravle , la kehila del sementeryo de Ulus estava yena asta tener munchos yahidim en pyez....
Tres anyos despues de la muerte de Rav David Asseo, mujeres i ombres, aedados i mansevos, entre los kualos el Gran Rabbino Ishak Haleva, nombrozos myembros del Bedin, el Prezidente de muestra komunidad Silvyo Ovadya, el Prezidente onoraryo Bension Pinto, multiples dirijentes de ovras ansi ke de institutos komunitaryos i tambyen djente del puevlo,  estavan prezentes  para onorar la memorya de un Ombre djusto, bueno i muy humano... un Ombre ke (lo repeto) tuvo syempre su puerta avyerta para todos los ke tenian menester de su ayudo o de sus konsejos.
Todos endjuntos, mujeres i ombres, ken a boz alta, ken a boz basha dishimos el Kadish i fue un momente de muy fuerte emosyon ande mos sintimos, a egualidad, kriansas del Todo Poderozo, unidos en una mizma orasyon.
La seremonia empeso kon un muy sinyifikativo diskorso de Rav Adoni ke mos avlo kon respekto i fervor de Rav David Asseo el kual fue su profesor i su giador. El le atribuo las tres koronas de las kualas avla el Pirke Avod,  "la de de los Kohanim, de los giadores", "la  real" en tanto ke kapo espiritual de muestra kolektividad,  i enfin "la korona de buena fama."
Rav Adoni  asemejo el ke fue su maestro a un pozo enkalado, el kual (sin deshar nada pedrer)  rekojo todo lo ke le avia transmetido su predesesor Rav Rafael Saban de bindicha memorya, para a su torno transmeterlo a sus dishiplos...
Tuvo razon, Rav Adoni, de atardarse sovre este punto. La  transmisyon de la  Ley (en su  profunda sinyifikasyon de Humanismo i  Djustisya)  es  uno de los  elementos ke aseguran la perpetuidad del Judaizmo, syempre atado al mensaje resivido sovre el monte Sinai...
Sovre tres  bazas el mundo se sostyene dize el Pirke Avot LA LEY, EL LAVORO i LA BYENFEZENSYA . Esto fue los prinsipyos de Rav Asseo... Munchas vezes, durante los anyos ande yo era aktiva en la Matan Baseter,  fui personalmente shaet (testiguo) de sus nombrozas intervensyones, syempre en favor de los desmazalados ...para el una koza era primordyal " ayudar, sin nunka umilyar".
Un dia ke kon unas kuantas amigas, le aviamos demandado ke mos avle sovre el Judaizmo, Rav Asseo (l.z.) mos  disho ke las tres grandes Relijyones Monoteistas repozan sovre tres prinsipyos LA FEY, EL VERBO i LA AKSYON.
La Fey es el prinsipyo el mas fuerte del Islam
"El Verbo" del  Kristyanizno
"La aksyon" del  Judaizmo
Para el, la Etika azia syempre parte integrante de la Torah. Ansi syempre ke lo enkontrava (no se por ke mekanizmo de reminisensya) me venia al tino estas palavras de Esai:

........Ke me emporta la muchidumbre de vuestros sakrifisyos (dize Yahve)
Esto arto de kaparot i de la godrura de los sakrifisyos.
La sangre de los toros i de los karneros me desgustan...(Am. 5- 21)
.............
Kita(d) vuestra maldad de delantre mis ojos
Ambezavos a azer el Byen
Bushka(d) el "derecho"
Akudi(d) el oprimido
Sed djustos para el guerfano
İ syempre defende(d) la bivda.
(Am. 5- 14+15)