Rav Yeuda ADONİLa peraşa de la semana "Vaethanan" su kontenido el mas enteresante es, la repetisyon de los 10 mandamyentos. La aliansa entre el D... i el puevlo Israel "Şene Lukot aberit" en el monte de Sinay.
Kada uno de las 10 mandamyentos es un pilar fondemantal de la nasyon Cudiya, i en mizmo tyenpo de la vida Humana. La faltura de eyos es la ruina de la sosyetad, i de los dereço humanos no se puede pensar la kontinuasyon de una kollektividad sin su aplikasyon.
La nasyon Cudia fue kargada esta alliansa motivada kon las leyes etikas, a no asimilarse a la kultura pagana. El, propajo el Monoteismo, guadrando su propya dinyitad i en syendo el model a la rasa Humane sin empozar, i sin gerear para propajar el monoteismo, komo lo vimos muy byen en la istorya de las relijyones.
El, konservo su Tradisyon sin azer ninguna konsesyon, de su kultura.
Es enteresante de sulinyar el mandamyento de respektar padre i madre para ke se alarge los dias de la vida, porke la Tora mansyono por esta mitsva una paga spesiyal? Ke ez la fakultidad de esta mitsva? Por ke, la valor de esta ordenansa es maz ke las otras mitsvot ke egziste en la Ley?
Kon esta paga buena la Tora nos kijo remeter un mesaj muy emportante, komo el oksijen a la vida de la persona, ansi el respekto al padre i madre ez la vida de kontinuasyon komo puevlo de İsrael. El respekto a las tradisyones ke resivimos de nuestros padre i madres no es solo individual i semple komo lo meldamos, sino ke es tanbyen konservar lo ke resivimos de nuestros avuelos.
Si nozotros respektamos lo pasado, i las tradisyones, alargamos la egzistensya. İ la kontinuasyos komo puevlo de Yisrael. İ esto es la esplikasyon de la egzistensya de Yisrael, entre todas las nasyones ke se deperyeron en la sena de la İstorya.
