Otra vizyon de Büyükada

Ninet BİVAS
Kada diya muy denprano salen de kaza las sportivas. Grupos de mujeres kaminan encuntos. Ay ke se van solas, kon el kordon de la radyo enkolgado en las orejas. Unas indo kon tempo, otras avlando, kontandosen de parte i de otra evenimyentos todo en detenyendo bokalikos de agua en la mano. Ombres indo al echo saludan. Las mujeres se kudyan de parte i de otra kuando se rankotran: “Ay diyas ke no te veygo?” “Oy tadrates.” Los haberes de la komunita, bodas, berit, las envitasyones es en este kamino ke se kontan. Las ke azen el grande torno se arepozan dospuez en el kafe Mavi. Aki se beve chay i agua en mirando a la ermoza vista de Heybeli, la isla justo enfrente, la mar i lechos la silueta de Estanbol. Los arvoles de pino azen una dulse solombra kuando esta kaynte. En diyas kuvyertos es agreable de oyir el bruido del ayre entre los pinos. De vez en kuando una mujer o un ombre de una sierta edad aziendo esforsos avansan a poko por el kenar kontentes, kon la sonriza en la kara. Akompanyadas por sus perros mujeres djuran a los pasajeros ke se espantan ke es inosente. A la fin de la semana i los ombres toman parte de este sport. Algunos koryen malgrado la alta temperatura. Otros preferan diskutir de echo o viyajes todo en avansando. Presto o avagar kada uno al ritmo suyo; el kaminar tiene un efekto pozitivo sovre la salud del puerpo i mental.