KUENTOS I LEJENDAS Rashi i el Papaz

Coya DELEVİ

Rav Shlomo Yitzhaki , yamado tambyen Rashi, ke biviya en Troyes, sivdad de la rejyon Champagne en Fransia, estava viajando en el Oriente. Teniya por buto de vijitar las Akademias Djudias. En el korso de este viaje renkontro un papaz indose a Yerushalayim en pelegrinaje.
Los doz ombres de ley tuvyeron una konversasyon bastante amikale por un largo momento. Ma, poko a poko, empesaron a una diskusyon relijyoza ke los opozo uno al otro, de sorte ke la tadre, kuando arivaron al "Kervansaray" estavan kaji aravyados.
Entervalo de la noche, el papaz, no akustumbrado al klima kayente, i kansado del largo viyaje, kayo hazino grave. El Rashi ke fue informado de esto, fue bastante orozo de melezinar el papaz. Se puede afilu dezir ke le salvo la vida. Komo todos los rabinos de akel tyempo , i Rashi teniya una syerta konosensya de medikeria. Seguro, su viaje fue atrazado. El papaz, saludozo, lo rengrasyo kalorozamente en dizyendo:
"So tan prove ke no puedo nada por vos, mas ke rogar los sielos de darme un diya la okazyon de mostrar mi rekonosensya".
"No me devesh nada" disho Rashi,i adjusto : "Si las kreensas mos separan, la relijyon portanto mas auna. La ley de Moshe me ordena de komportarme komo lo ize. Si algun diya , renkontraj un Djudio en estrechura, le dash ayudo en mi rekodro."
Paso anyos.... Rashi tornando a Fransia, paso por la Bohemia i se areto en Prague. Los djudios de esta sivdad orozos de resivir un rabino tan eminente, le izyeron grandes onores.  Akeya epoka los Djudios de Prague estavan debasho la dominasyon del Duke Wladislas , ke los aborresiya i no mankava dinguna okazyon de mostrar su enemistad.
Efektivamente dyo orden de arestar este rabino estranyero. Asegun el Duke , Rashi se topava en Prague kon el buto de komplotar kontra el rey. La komunidad djudia de la sivdad estava dezesperada de ver Rashi atado kon kavenas , delantre del Duke, ki sin dubyo iva anonsar su kondenasyon.
En supeto vyeron el Kardinal d’Olmutz aserkarse del Duke i dezirle :
"Ekselans, me esto opozando a la kondenasyon de esto djudio , afilu de kavzarle el maz chiko danyo. El es una persona de korason i konsensya egzemplarya."
Toda la asistensya kedo enkantada de esta intervansyon inesperada. Alora , el Kardinal , kon grande emosyon , konto komo antes unos kuantos anyos, kuando era un simple papaz i viajava a pye , a Yerushalayim, fue apiadado por este djenerozo rabino.
El Duke, despues de aver sintido esto, ordeno la liberasyon de Rashi i de darle un akompanyamiento de onor a su partensya. Grasyas a la proteksyon del Kardinal d’Olmutz ke aviya guadrado un rekodro rekonosyente , los djudios de Bohemia bivyeron en kalmo i repozo durante munchos anyos.

Manadero
Contes et Legendes d’Israel