Sovre el Monte Skopus el Katorzeno Kongreso Mundyal de Estudyos JudyosEn la vyeja sivdad serka del K

Hazar Yahudileri, günümüzde pek hatırlanmasalar da sadece Türk, Yahudi ve Kafkas tarihi açısından değil, bir bütün olarak dünya tarihi için büyük öneme sahip bir halktır. 5. yüzyıldan itibaren devletlerini oluşturmaya başlayan ve farklı dönemlerde İsrail, Bizans ve İran`dan aldığı göçlerle bir Yahudi sığınağı

Judeo-Espanyol
9 Ocak 2008 Çarşamba

Klara PERAHYA

Yerushalayim de oro i de luz ...punto de juntura  del "Pasado  i  del Avenir" ...lugar bendicho ande se enkontran: "el Realizmo i la Espiritualidad",  "la Tradisyon i la Sensya", "el Respekto de los Tyempos Antigos" i "el Progreso en la plenitud de su evolusyon".....De una parte el Kotel Maravi , de la otra la maraviyoza Univetrsidad ebraika situada sovre el monte Skopus.

Karen Gerşon- Şarhon, Elie i yo vos daremos poko a poko en los proksimos numeros del "ŞALOM" komo del  "AMANESER", muetras impresyones de estas maraviyozas eksperyensas en mizmo tyempo kultural i sosyal, ke fueron el Pre-kolokyo i el " Fourteenth World Congress of Jewish Studies "   el mizmo.

Arrivo (myerkoles un poko antes de medya noche)  al otel del kampus de la Universidad Hebraika situada sovre el Monte Skopus 

El djueves (de la manyana asta la tadre) debasho la prezidensya de la Profesora Margalit Bejerano, un kurto ma muy substansyal  pre-kolokyo ke tuvo komo tema prinsipal: "Los elementos sosyo-historikos del Sefaradizmo de la Amerika Latina i tambyen de syertos payizes orientales".

Karen Gerşon-Şarhon  fue invitada a tomar la palavra i eya (de una manera majistral i  en un inglez ke izo la admirasyon de la totalidad de los oyentes) mos avlo de las fluktuasyones de la lingua Sefaradi en Turkia, i de las razones de las imigrasyones al prisipyo del venten siglo.

Enkontrimos en este kolokyo Mordehai Arbell. El era, ay de esto 4 o 5 dekadas, konsul de Israel en Turkia, joven en akeya epoka de apenas 25 anyos, yeno de enerjia i de entuzyasmo, i a la sigida, Embashador en syertos payizes de la Amerika Latina. El no
yedro kaji nada de su vivasidad del tyempo de la manseves  i mos avlo de sus eksperyensas i sus observasyones muy judisyozas a propozito del Sefaradizmo i del Judaizmo en estos lugares. 

Este pre-kongreso fue un enkontro muy fruktuozo, durante el kual en una atmosfera muy amigavle uvo diferentes kambyos de ideas ke anchearon muestra vizyon del Sefaradizmo espandido un poko en kada kanton del mundo.

Syertos partisipantes me dyeron una kopya de sus avlas i sera para mi un grande plazer (en la semanas venideras) de partajar kon los lektores del ŞALOM las refleksyones de estos grandes historyanos i lenguistos.

El dia sigiente,  giados por muestro amigo Eliyezer Papo,Vice Direktor del Sentro Moshe Gaon de la Universidad Ben- Gurion de Bersheva, vijitimos (personalmente por la primera vez) el bloko de las kuatro Keilot situadas en la vyeja sivdad de Yerushalayim.

De leshos, poko mas altos kel nivel de la tyerra, adjuntados a la baza por galerias interyores, los techos kaji apekados los unos a los otros de kuatro chikas Sinagogas ... un djenero de chika forteresa espiritual ke syertas vezes tuvo a rezistir a los asaltos de los tribos arabos ...

"Del fondo del abizmo te rogo mi Dyo..."  mos dize la Biblia. La razon reel de estos tejados kaji al nivel de la tyerra es la sigiente. 

Segun el Kodigo de  Leyes de Omar, todos los edifisyos ke egzistian antes de la konkuesta Otomana puedian ser konservados, entretenidos i adovados en kavzo de nesesidad. Ma ningun edifisyo muevo  puedia ser fraguado sin una
esensya espesyal  muy difisil a obtener.I mizmo en este kavzo, la muevas konstruksyones de los "dimis" (los non-Muzulmanos) no devian nunka ser mas altas ke las de los Muzulmanos....

Delantre una semejante situasyon, kuando los Judyos, despues multiples esforsos, parvenian a obtener el permeso menesterozo para konstruir, eyos kavakavan profondamente la tyerra afin ke lo ke devian fraguar no fuera muy vizivle.

En el kavzo del komplekso de las kuatro Sinagogas, muestros korelijyonaryos de la epoka tenian la lesensya solo por una Keila, alora tuvyeron rekorso al  subterfujyo de  adjuntar los kuatro techos afin de dar la impresyon ke se trata de un uniko edifisyo.

Kuatro sanktuaryos:

El primer nombrado "Eliyau Anavi" fraguado en el anyo 1586.  Una lejenda mos dize ke un dia  ke  avia solo mueve ombres a las oras de la tefila i ke sin minyan no se puedia dizir la orasyon, un  vyejiziko aparesyo en supito,  dublado en dos , la kara rugada ma los ojos yenos de una luz seleste. La orasyon fue dicha kon grande fervor... ma immedyatamente despues, el vijitador dezaparesyo sin deshar la mas chika trasa. Ken puedia ser este per
onaje deskonosido? si no Eliyau Anavi. La segunda Keila fraguada entre 1604 i 1610 fue nombrada "la Keila de Rebi Yohanan Ben Zakay" . Es aya ke se topava la famoza Akademia Rabbinika ke aseguro la perenidad del Judaizmo. Al bodre de  una ventanika serka del tavan,  un Shofar i una alkuza de azete ke servira a asender la Menorah kuando el mizmo Eliau Anavi vendra un dia sonar el shofar La tresera Keila es un espasyo medyano fraguado entre 1702 i 1720 La kuatrena nombrada "Istambuli", frekuentada por Judyos Portugezes, fue eya fraguada en 1761 kon una Teva  semejante a la del Templo de Yerushalayim.  İ es en esta atmosfera  yena no solo de relijyozidad i de rekuerdos del pasado, ma de un sentimyento de profonda espiritualidad ke Karen Gershon-Sharkon ( kon su boz tan kayente ke save ser singun las sirkunstansyas alegre o triste, espyegla o profonda) mos kanto "Leha Dodi".
Fue un momento de grande emosyon, un momento  de paz interyor, un momento de Esperansa i de Kreensa.