El vendedor de arena kon bokalikos
Un otro tipo ke siempre viniya semanas de las fiestas era El Vendedor de arena kon bokalikos.
Arena era lo ke uzavan las mujeres kuando fregavan los paylones i tenceres para ke salga lo ke se apego de komidas despues ke fueron gizadas. Munchos anios antes no egzistiya los produktos modernos de oy, la arena se uzava kon shavon para ke briyara el dip de el paylon ou de el tencere.
El vendedor dava la arena kontra bokales vaziyos ke las mujeres rekojiyan. Estos bokales valiyan buen presio, porke se retornavan a sus orijines para ke se inchan demuevo kon el produkto ke se vendiya. Bien entendido, antes no aviya grande produktion de bokales.
Las mujeres les mostravan al vendedor todo lo ke teniyan de alimpiar, i el vendedor les diziya: Kuatro bokales me vaz adar ou sinko bokales me vaz adar. Egzistiya un trato muy grande.
Areno can bokalikos era los gritos ke echava el vendedor Turko en Espanyol i era un ufisio muy briyante.
El Maronhcinero
El Maronchinero, era el vendedor de Mogados de Almendra, i Maronchinos.
Maronchinos se aziya, i ainda oy se aze de masa de almendra formada komo un piramidiko çiko i echado a el orno para ke se toste un poko la almendra. La savor es muy delicioza.
El Maronchinero vendiya sus deliciozas kozas siempre despues de medio dia porke le mujer lo preparava todo la demanyana i verso las kuatro de la tadre saliya el Maronchinero a la plasa a vender su ropa.
Para todo modo de okazion, se yevava un kuti de mogados de almendra, ou de maronchinos. Sous condisiones de vendida era siempre se deve de merkar 11 mogados ou vente i dos mogados dependiya de la emportansa de la vijita. Nunka te vendiya 12 ou 15 ou vente. Deve ser 11, ou 22, pedasos.
Kada diya estos mogados i maronchinos se azianen kaza en condisiones mouy primitivas. El diya ke no saliya a vender, es ke no le reusheron los mogados i maronchinos a la mujer, akel diya se sintiya gritos i peleyas an su famiya.
