C.D.
Mezma data, mezma ora, antes 513 anyos? 2 Agosto 1492. El tyempo se esta akavando... tyempo akordado kon el "Dekreto d e Ekspulsion" sinyado por la Reyna İsabella i el Rey Ferdinand i ovligando los Djudios de deshar todos sus byenes i abandonar la Espanya por entero. Suvyendo a los galeones (kadırga) ke los van a yevar a las tyerras leshanas, estan reselozos i tambyen rezinyados a sus mueva suerte. Ma, es una suerte mizerikordyoza ke los izo akostar a las oriyas ospitalyeras Otomanas antes sinko siglos...
Oy, aniversaryo de un evenimiento inolvidavle para mozotros, kero realizar el primer paso de un prodjekto, ke en realidad se empeso a formar en mi kavesa, la noche de los premios del konkorso ``Gila Kohen III. Öykü Yarışması``: una seria de Kuentos i Lejendas Djudios.
Estos tektos prezentan una grande diversidad, ekspozando la vida del puevlo Djudio, su nostaljia de una patria ke syempre penso toparla, ma ke pyedro, las amenazas ke enkontro i su dezeo de una egzistensya kalma i pasifika. Es un largo viaje a traves los siglos, de la Afrika, a la Evropa, a las oriyas de la Mediterranea, de la Espanya a la Polonia o a las Tyerras Santas.
Dingun puevlo no tuvo un destino tan avanturozo, amargo por lo mas, orozo syertas vezes?, ma syempre en bushkida de una tyerra. En estas emigrasyones, el lektor se esta indo el tambyen a todas las rejyones ande se dispersyo este puevlo durante la istorya, i estamos testigos de su unidad, frente las sufriensas i amarguras.
Syertos tekstos son tomados de los livros santos, otros transmetidos tradisyonalmente, de djerenansyo en djerenansyo konservados asta oy, kon sus ekspresyones en vezes kaji naivas. De syerto, los ijos de İsrael, en la istorya, fueron munchas vezes uzurpados i arrondjados de las tyerras ke adoptaron i amaron. Egzaktamente komo fue antes 5 siglos, en la tempesta de terror de la İnkizisyon Espanyola.
İ mozotros, Djudios de Turkiya, ke esta tempesta echo a los portos tolerantes Otomanos, tenemos la onor i el orgolyo de ser suditos Turkos. Tenemos tambyen la kontentes de bivir desde 500 anyos, en repozo, konservando muestra libertad de lingua, relijyon, orasyon, tradisyon i uzos. Sinseramente espero, ke estos versos miyos, podran reushir tan poko seya, a eksprimir muestros sentimyentos de rekonosensya i agradesimyento.
Coya Delevi
2 Agosto 2005
AKI DESDE KINYENTOS ANYOS
En Granada, Djudyos, Muzulman, Kristyanos,
Bivyeron en tan grande paz, anyos i anyos.
En mil kuatro syentos i noventa i doz (1492),
El Rey Ferdinand i la Reyna Isabella,
Djuraron, esta buena paz, a dezazerla?
Una tempesta? de Aragon i Kastilya,
Sangre i polvora en toda la Peninsula.
La Inkizisyon kema grupos de Djudyos,
Los non-Kristyanos, de koferút akuzados,
De la parte de relijyozos fanatikos.
Los Djudyos, sintyendo en sus piskuesos,
El terrivle, malo soplo de la muerte,
No saven kualo va a ser sus suerte.
I antes de dar mas i mas munchas viktimas,
Bushkan otra una vez muevas patriyas.
Los esparesidos, en Evropa kedando,
Sus mala suerte se esta eskrivyendo.
A otros, el Otomano les avryo los brasos,
Al payis Turko se van estos mazalozos,
Ande bivimos desde mas de sinko siglos,
En kalmo, paz i kon todos muestros uzos.
Durante la istorya bushkimos patriyas,
Fuimos egzilados de muestras tyerras,
Fuimos tan despresyados i arrondjados.
Ma aki estamos desde kinyentos anyos.
El Djudaizmo i la Fey no enyegamos.
El Turko i el Ladino tambyen avlamos.
Al ke mos avryo los brasos anyos antes,
Semos agradesyentes i rekonosyentes.
COYA DELEVI /Estambol
