Klara PERAHYA
El terrorizmo chapteo de muevo a la puerta del destino humano, syego en su krueldad ...Al pareser ay en el, komo una veluntad de matar solo para matar, de destruir ken ke sea ...
En el kavzo del karnaje de Charm el Cheik, la mas parte de los ke muryeron eran muzulmanos, empyegados de oteles , lavorantes , personas ke se topavan aya en el solo eskopo de ganar dos groshes ke serviran a mantener sus famiya...I de muevo lagrimas, dolor, ninyos ke se engradeseran sin padre o sin madre...
Uno de los puntos los mas de espantar es djustamente este irrasyonalizmo del akto, i sovre todo esta absensya total de una kualkyer konsensya de la sakralidad de la vida, asta mandar sus propyos ijos a la muerte..
Ay en el integrizmo, un orgolyo desmezurado ke pretende meterse al servisyo de Dyo, ma ke al fondo lo renyega, en refuzando de bivir o de deshar kada uno bivir su propyo destino.
Oy en dia, un otro peligro parese surjir del kaos de estas pasyones . Este peligro es (komo lo disho la otra noche, un komentador de la Televizyon Franseza) "la multitud de kavesas ke egzisten en este movimyento de terrorizmo".
Segun el mizmo djornalisto: "Una kuantidad inkontrolavle de partidos se formaron aryento del partido sentral , syempre kon el mizmo ideal i el mizmo modo de pensar, ma loskualos lavoran de una manera enteramente otonoma".
Por kontra, se ve komo un chiko trokamyento en la opinyon de la totalidad de la komunidad internasyonal. . Al lado de los Estados Unidos i de la Evropa , la Rusia, el Iran, la Siriya, la Autoridad Palestinyana etc...etc...todos manifestaron fuertemente sus reprobasyon kontra este akto salvaje.
Numerozos payizes propozaron immedyatamente sus asistensya i en este eskopo Israel metyo en estado de alerta nombrozos ekipos de urjensya para los primeros kudyos...No konosemos la repuesta del Ejipto...İsrael avia echo la mizma propozisyon , unos kuantos anyos antes, kuando un terrivle terremoto avia devastado una partida del Iran... Malorozamente, malgrado el menester presante de una semejante asistensya, las otoridades İranyanas avian refuzado.
Alhad, en las kayes de Charm el Cheik i del Sinay, 2000 mansevos, pankartas en las manos, protestaron kon vehemensya kontra el terrorizmo, afirmando sus voluntad de luchar kontra el ...Nombrozos turistos estranjeros retornaron a sus payizes ma syertos otros kedaron en Ejipto para afirmar sus desizyon de no abokar la kavesa.
Es ke esto abastara? En todo kavzo, esto es un primer paso muy pozitivo...Los mas grandes kombates nasen de la simple revolta kontra el mal, de este menester imperyozo de intervenir, de azer reelmente una koza, mizmo si al empesijo el esforso parese utopiko.
No mos olvidaremos ke todas las relijyones, la Kristyana, la Muzulmana, la Judiya , la Budista etc...son bazadas sovre prinsipyos etikos: "la kerensya", "el respekto de la vida del otro" i "el ayudo mutual".
