Şimon Bwblevi/Israel
El Profesor Isak Jeruzalmi nasyo en Kuzguncuk en 1928. Yo nasi en el 1936 en mizmo tyempo kon los dos ermanos Bardavid: Moni (Süleyman) i Beto (Ibrahim); Rifat Abuisak i Naim Halfon. Malgrado ke Isak era mas grande de mozos, mos izimos amigos grandes i mos metimos el nombre de “chete” i a el lo yamimoz i ainda lo yamavavamos “shef”. Kuando Süleyman Bardavid se kazo kon Beki Albukrek z”l, i a eya la izimos myembra de la cheta i ansi fue kuando Isak se kazo kon Nimet Hananel Tanrimen.
Isak Jerusalmi se fue a la Amerika para azer estudyos de hahamlik. Kuando torno atras a Estambol a azer el askerlik, diya de Rosh Asahana, vino al kal de Kuzguncuk kon la djubbe blanka i todos se alevantaron en pies para azerle onor. Los yehidim (!) insistieron ke les de un deskorso i el se alevanto i avlo de la fiesta de Ros Ashana. El era una persona muy plazyente i de grande umildad. En 1964, la cheta entera kon Nimet i la ijika Stella, mos topimos en Paris i Isak mos kamino la Côte d’Azur entera. Viajar i topar kozas muevas, lugares muevos, amostrar a sus ijos i a sus amigos era el plazer el mas grande para el. Kuzguncuk era su amor. En kada vez ke viniyan kon Nimet i la famiya, nunka no manko de vinir al kal.
Yo lo keriya muncho bien al Profesor Haham Jerusalmi o Yerushalmi komo lo yamavan sus elevos. Embiyo mis kondoleansas a su kerida mujer Nimet, a sus ijas Stella, Hanna Grasya i Penina i a su ijo David i inyetos i inyetas. Ke su alma repoze en Ganeden. Amen
