Komo Akiva se izo grande savyo?

Coya DELEVİ Judeo-Espanyol
9 Mayıs 2018 Çarşamba

Kalba Sabua, grande senyor en Yerushalayim, posedava trupas de kodreros i nombrozos pastores. Entre eyos, Akiva se remarkava por su piadad i komporto korekto. Un diya Rahel, la ija del patron, renomada por sus vertudes le disho: “Akiva, te vo azer una propozisyon: “Si te konsakras enteramente al estudyo de la TORA, esto pronta a kazarme kon ti”. Akiva syempre teniya el suenyo de azerse grande Haham. Es ke estava serka de alkansar a este dezeo? Entuzyazmado apenas topo fuersa de avlar: “Estudyar? Es mi grande dezeo. Ma, yo no me syento dinyo de ti”.

La vertuoza Rahel respondyo ke si estudyava la TORA, el seriya dinyo. Se espozaron en sekreto. El padre lo supo i se ensanyo. Kualo? La ija regalada del riko del pais, iva tomar un prove pastor? I, enfrente la rezolusyon de Rahel, djuro de deskonoserla komo eredadera. Ansi, Rahel iva kedar toda su vida la mujer del mizeravle pastor, i arrondjados de kaza. Los mansevos se kazaron en kompleta mizerya. Posedavan solo una “kuliba” por abrigo i durmiyan ensima pajas. Syempre ke Akiva diziya ser el responsavle de esto, Rahel respondiya ke las rikezas terrestras no le enteresavan. Era por el amor de la TORA ke aviya segido Akiva. Ansi Rahel lo afalagava.

Un diya, el Profeta Eliau Anavi, degizado en sedakero, se aserko de eyos demandando piadad para su kriatura hazina. Disho ser muy prove i no teniya  paja para echarlo. Akiva, de vista tomo paja de su lecho para dar al estranyero, dizyendo a Rahel ke aviya mas proves ke eyos… ampesaron a bushkar eskola ande Akiva podriya ambezar la TORA. “No tornes sin devenir un maestro, un savyo en Israel” le enkomendo Rahel, asigurando su marido ke el Grande Piadozo no lo iva abandonar. Eya estava tan sigura ke Akiva acheto de partir.

12 anyos estudyo kon sukseso en las eskolas de Rabbi Eliezer i Rabbi Yoshua Ben Hananiah. Ansi, fue klasado al rango de los Hahamim i savyos de Israel. Vino el momento de topar Rahel. Kon grande emosyon arrivo delantre su kuliba. Se enkanto de oyir la boz de Rahel i una boz de ombre: “Tus paryentes teniyan razon de echarte de kaza por un ombre indinyo ke te abandono anyos sin darte dinguna novela”. Rahel respondyo ke dechidaron ansi kon Akiva. Si aviya menester, oy mizmo le konsejariya de kedar otros 12 anyos, asta ke el seya una luz de Israel.

Akiva, sintyendo esto, se emosyono. Sin entrar, retorno a sus maestros. Solo el Todo Poderozo fue testigo. A la fin de otros 12 anyos, Akiva alkanso a una grande nombradiya. Torno a su pais tenyendo vente i kuatro mil elevos de todas las partes. Entre el puevlo ke koryo para ver el ilustro doktor aviya una mujer de vista mizeravle. Se aserko de Akiva ma los dishiplos keryendo arrondjarla, el savyo les disho: “Deshaldad! Si semos oy lo ke semos, es a eya ke lo devemos.

Los elevos, kon respekto se enkorvaron delantre Rahel. Kalba Sabua, vyendo esto se sintyo orgolyozo de tal yerno. Lo arresivyo kon todas las onores i se dezato de la djura ke aviya echo. Desho su imensa fortuna a su ija Rahel. Fue entonses ke la boda de Akiva i Rahel, se selebro kon fyestas. Nunka kazamyento konosyo semejante esplendor. Se selebro tambyen, la glorya de la Ley Divina, a la kuala todos los dos se aviyan konsakrado kon eroismo.