Tuvimos el plazer i la sorpreza de ver ke muestro amigo partisipo al program prezentado por el aktor Murat Yıldırım.
Te rengrasio, kerido Albert, sovre todo ke me respondites en Judeo-Espanyol.
“Bonjour, les Saul!” mos dizias, tu korriendo, Viktor i yo kaminando, fin de semana en Bebek. No mankavas de kedarte i demandarmos: “Comment allez-vous?” La repuesta de Viktor: “A pied, cher Albert!”
Albert, saves el mesaje ke dates al empesijo del program en kontando:
“Yo paso una ora i media para irme de mi kaza al lavoro kada dia en el karro. Ma topi el remedio: Meldo livros del internet, no me inyervo ni me peleyo mas. Ma gano de meldar livros interesantes.”
Por siguro la djente te van a kopiar – ma aziendo atension al trafik, espero!
Las kestiones las topi bastante difisil. Mos puedes kontar las ke te forsaron lo mas. Malgrado ke, komo dize Viktor, sos un intelektual?
Uno de los programes más populares i ke me plaze muncho ver es “Kim Milyoner Olmak İster” (Ken kere azerse milyonario). La mayoría de las vezes veo este program i veo ke puedo responder a munchas preguntas. Ansi pensí de partisipar a este program. La razon no fue para ganar moneda. En primer lugar, dar un mensaje a los espektadores, en un programa de este tipo i más importante, para dar informasión a los espektadores sovre la komunidad judía en Turkía i konseptos yerrados, en kontando la informasión korrekta. También ganar moneda en este konkurso para utilizar para el lavoro de bienfezensia. Komo todo el mundo save, no keren edukar a sus ijos, espesialmente las ijikas, en las zonas rurales en Turkía. Kería ayudar la edukasión de las ijikas ke perdieron a sus padre en Soma. De este modo, tendría la oportunidad de servir dos propózitos. Despues, lo evaluí i me uní a la kompetensia.
Las primeras dos kestiones fueron muy simple, pero las otras eran muy difísiles. La tresera era sovre tipos de kezo. Para esta kestion yo demandi el ayudo de la audiensia. La sigiente fue muy difísil para mí. Me demandaron el número de un autobús ke opera en una ruta determinada. Logrí de topar la repuesta uzando el sentido komun. En la kestion de múzika, orozamente, la repuesta estava en la kestion misma. Respondí la sigiente kestion sovre un atlet de maratón kon el ayudo de mi joker telefóniko, Jak Kori. Una vez más, grasias a él, reushí. La sigiente sovre los tipos de animal fue bastante difísil. Otra vez uzando algo de lójika, yo topi la repuesta. La sigiente fue inkreívlemente difísil. Se tratava de un símbolo utilizado en una karta en 1536. No avía posibilidad ke pudiera saver la repuesta i no puedía azer razonamiento lójiko. Ansi es ke piedrí.
Malgrado todo, esto muy kontente de aver partisipado en este program. Logrí de dar algunos konosimientos sovre la istoria de los judíos en Turkía i también di algunos mesajes sovre kómo ayudar a las ijikas a edukarsen.
Kerido Albert, saves ke me enkanti de tu saver avlar en muestra lingua ansestral ke tenemos el dever i plazer de no deshar peryer. Muestro buto es de saverla biva.
