Keridos Korelijionarios,
Este anyo selebramos el “Pesah” ke es la fiesta de la libertad i de la primavera djuntos kon “Shabat” bendicho.
Es ansi ke unifikamos en nuestras orasiones i selebrasiones el evento de “Maase Bereshit/Evento de Kreasion” djuntos kon el evento de “Yetsiyat Mitsrayim/Salidura de Ayifto”.
Ya lo savemos muy bien ke el “Yetsiyat Mitsrayim” es nuestro pasaje del “Meavdut Leherut Umishibud Ligula/Del esklavaje a la Libertad i del Kativerio a la Salvasion” por todos nozotros.
Tanbien ya es savido ke el “Shabat” es el sentro de la disiplina de nuestra Santa Tora regalada a nuestros abuelos dospues de esta libertad.
De este punto de vista, pudemos dizir sin ningun dubyo ke la libertad i la disiplina son los dos elementos ke kompletan i fortifikan el uno al otro en todo modo de senso.
Kon este entendimyento agradesemos a nuestro Dyo ke nos ayego a fiestar estas dos selebrasiones djuntos nuestros keridos i serkanos al rededeor de el pranso de “Seder”.
“Baruh Sheeheyanu Vekiyemanu Veigiyanu Lazeman Aze.”
Keridos Ermanos,
El buto prensipal de la “Agada de Pesah” ke resitamos en el pranso de “Seder” es revitalizar una otra ves nuestra konsensya sovre el evenemento de “Yetsiyat Mitsrayim”. Todo en dandonos la oportunidad de edukar nuestos ninyos i jovenes en esta okazion. Es por esto ke la “Agada” deve ser bien komentada, bien eksplikada i bien entedida.
“Veigadta Levinha.../Kontaresh a Vuestros Ijos...”
Kero akordarvos ke nuestra egzistensia depende de transmeter nuestra ley i kultura a las jenerasiones vinideras kon muncho kudiado.
No ay dubyo ke el apoyar i el sostener seya moralmente o seya materialmente a los dirijentes de nuestra komunidad ke siempre dan esforsos presiozos por nuestra komunidad, i ayudarles kon vuestras ideas kreativas tendra una alta valor. Espero ke nuestros ermanos no mankaran de tomar parte en los esforsos komunales.
Siendo yeno de estos pensamientos i sintimientos, vos bendigo a todos vozotros kon todas las bendisiones de la Santa Tora i vos auguro un buen Pesah kon todos vuestros keridos i serkanos dentro union, salud, pas i prosperidad.
Shabat Shalom,
Hag Pesah Sameah,
Rav İsak HALEVA
Gran Rabino
