Este anyo sinko filmos kon temas judias van a kompetir por el Oskar

Dora NİYEGO Judeo-Espanyol
31 Ocak 2018 Çarşamba

Dirijido por Samuel Maoz, “Foxtrot” es un filmo kon temas obskuros: la tristeza del padre despues de la muerte de un ijo soldado, las alegrias i el stres del kazamiento, i los problemas de la vida militar. Las estreyas de este filmo son Lior Ashkenazi i Sarah Adler.

Despues ke gano el segundo premio en el Festival Enternasional del Sinema de Venezia, i ke fue elijido el mijor filmo en los Premios Ophir de Israel, este filmo agora esta en la lista de los kandidatos en el Premio de la Akademia, i va kompetir por el mijor filmo en la lingua etranjera.

En una entrevista, Samuel Maoz deskrivio su filmo en diziendo “Este filmo es el bayle de un ombre kon su destino. En este bayle ay munchas variasiones”.

El filmo “In the Fade”, esta kritikando el neonazizmo en la Alemania despues del asasinato de un kurdo, su mujer alemana, i su ijo, por los neonazis. El tema neonazi es la kritika del asenso (yükseliş) de la ekstrema derecha en Evropa. El direktor del filmo Fatih Akin, un turko kon nasionalidad alemana, esta amostrando ke el sentimiento neonazi esta kresiendo en Alemania. Los Alemanes se estan komportando komo enimigos a los muzulmanos, mezmo ke eyos los akseptaron a sus pais. “Los muevos neonazis son diferentes de los nazis de los anyos ochenta i noventa. Los de oy son kriminales” esta diziendo el direktor del filmo. “In the Fade”, gano el primer premio en el Globo de Oro en el ranko del mijor filmo etranjero. Agora va kompetir por el Oskar en el ranko del mijor filmo etranjero. En ebreo, la palavra para granada tiene dos sinyifikasiones. Esta fruta semboliza el renasimiento, i en mezmo tiempo, tiene la sinyifikasion de una bomba de mano.

El dokumanter “In the Land of Pomegranates”, dirijado por la israeli Hava Kohav Beller, esta gerreyando kon estas dos sinyifikasiones ke son kontradiktorias. El filmo esta eksplorando las formas ke los mansevos israelianos, i los mansevos palestinianos pensan el uno por el otro.

El filmo esta amostrando estos mansevos kuando se reunaron en una sivdad alemana para asistir en un programa yamado “Vakansas de la gerra”. Aya, estos mansevos estan biviendo en la mezma kaza, estan aziendo ekskursiones endjuntos en un ermozo kampo, i estan diskutiendo senseramente por oras.

Este programa empeso en el anyo 2002. Uno de los organizadores del programa esta diziendo “Muestro objetivo no es azer ke los partisipantes se keran bien. Si solo estos mansevos pueden bivir endjuntos... esto es un progreso”.

Ma, los argumentos politikos estan kontinuando entre los mansevos. El filmo esta amostrando ke los esfuersos por la pas son en vano. Ma, en el filmo los estamos viendo baylando sus dansas folklorikas. La horra de los israelianos i la dansa folklorika de los palestinianos se estan asemejando muncho.

Komo se puede ensenyar las kreaturas chikas sovre el Olokosto? Un dokumanter aparejado por el Dia Enternasional de la Rekordasion del Olokosto, esta amostrando un model por este objektivo.

En el filmo dokumanter “The Number on Great Granpa’s Arm”, el sovrevivente del Olokosto Jack Feldman, i su bizinyeto Elliott nasido en Estados Unidos, estan pasando tiempo endjuntos. El bizinyeto viendo un numero eskrito en el braso de su nono, le esta demandando kestiones sovre sus eksperiensas en el Olokosto.

El filmo mos esta amostrando ke Feldman emigro despues de la gerra i se estalo en Rochester, New York, ande avrio un magazen de pishkados. Feldman dirijo el negosio kon sukseso, ma kon una pekuliaridad. En una sena, un kliente afroamerikano esta diziendo, “Jack save lo ke es la ambre. El no esta pagando de los proves por los pishkados’’.

La dokumentalista Amy Schatz se sintio atirada a este projekto porke no ay material sovre el Olokosto por las kreaturas chikas. Su objetivo es de transmeter la eksperiensa del sovreviviente kon kalmo i klaridad.

El dokumanter “116 kamaras”, es uno de los mijores kandidatos para el mijor dokumanter kurto. El filmo esta ofriendo una mirada detras de la sena, en la filmasion del testimonio de un sovreviviente del Olokosto, Eva Schloss (ermana de Ann Frank). En el anyo 1986, Eva Schloss  se aviya desidado de avlar sovre sus eksperiensas para permeter ke otros se ambezen de su pasado. El projekto es un produkto de la Fondasion Shoah de Steven Spielberg, en la Universidad del Sur de California.