El Kompozitor Judio de Amalia Rodrigues: Alain Oulman

Amalia Rodrigues (1920-1999) fue la “Reyna de Fado”, la muzika famoza portugeza ke avla de tristeza, de la mala suerte i de las sufriensas de las personas.

Karen GERSON ŞARHON Judeo-Espanyol
10 Ocak 2018 Çarşamba

Amalia tenia una boz ekstraordinaria ke toka al korason de la persona ke la siente. no munchos saven ke el kompozitor de las kantikas las mas famozas de Amalia fue Alain Oulman (1928-1990) ke kompozo kantes eksklusivamente para Amalia desde ke se konosieron en 1962 asta ke el murio en 1990. Amalia dize en un reportaje: “Alain entendio mi boz, mi manera de kantar i mi dezeo de kantar poemas de los mas ilustres i eruditos poetas portugezes. Su muzika es mia, su muzika so yo...” Es muy raro ver la armoniya kompleta entre un kompozitor i la kantante ke kanta sus kansiones. El rezultado de este modo de armonia es una koza ekstraordinaria. Basta solo oyir una de la kantikas komo “Gaivota”, “Maria Lisboa” etc. Alain transformo el fado i eskrivio muzika ke tenia la struktura bazika del fado ma ke tenia muncho mas, kozas ke transendio el fado en una muzika del siglo 20. Ken mas puedia entender las sufriensas de personas ke un judio de padres fransezes ke perdieron tantos miembros de la familia en las sufriensas de la Sigunda Gerra Mundial. Su ijo, Nicholas Oulman izo un filmo de largo metraje, “Com Que Voz” (2009) ke gano premio de sinema. En este filmo, Nicholas mostra la vida de su padre, no solo komo un kompozitor ekstraordinario ma komo lo dize en un reportaje, komo “un ombre ke no tuvo una vida fasil, ke tuvo munchos problemas, munchas trajedias i sufriensas”. Komo dizen, las sufriensas forman el karakter de una persona i es en la mano de uno de transenderlas en una forma maraviyoza komo lo pudo azer Alain en kompozando muzika ke toka los korasones de las personas. Kale ke diga por final, ke no basta solo krear una kantika maraviyoza, kale tener una persona ke la interprete en una manera ke sea inolvidavle i esto es lo ke el duo Oulman-Rodrigues izieron. Ke maraviya para mozotros ke podemos sintir el rezultado i gozarlo.