No kero ser muy pesimista, porke yo penso ke dekoramos del nombre AMIGO o AMIGA una simple relasyon, un konosimiento o un vezindado banal. Aki, keridos lektores, vos kero sitar la definisyon remarkavle del famozo LA FONTAINE: Kada uno dize ser muestro amigo. Loko es el ke se kreye a esto. Nada es mas komun ke el nombre, nada es mas rala ke la koza, (la amistad)…
Espero ke lo tresladi komo se deve. Alora, vos puedo konsejar de tomar la pena de kontar el shifro de amigos/amigas ke tenesh o ke vos kedaron. Naturalmente, no se trata de los ke son reelmente sinseros. Orozamente ke tuve i tengo la shans de tener talas amigas. No son munchas, ma son sufizyente. La fuersa, el rekonforto moral de eyas es sufizyente.
Mis propozitos ke no vos enkanten, keridos lektores. Absolutamente no son la
ekspresyon de un pesimizmo. Simplemente, son frutos de anyos de observasyon i eksperyensas de una vida. Yo, antes munchos anyos, konosi una dama muy sezuda (asigun mi). De vez en kuando le demandava konsejos. Ma, koza kuryoza, no teniya amigas o muy pokas. Kuando le demandi la razon me respondyo ansi: Las amigas, en jeneral tienen el natural del melon. Deves aprovar sinkuenta para topar una buena!!! Sovre esta repuesta no topi byervos para responderle… Akeya epoka aviya pensado ke eran propozitos indjustos i pesimistos. Ma, kon los anyos, a la luz de mis observasyones la esto entendyendo mijor i en parte dando razon a la amiga de mi manseves.
Una dicha dize “Es la insufizensya de muestra persona ke aze naser la amistad i de mezmo es eya, kon su insufizensya ke la termina. Un poko onda esta dicha, ke pensash keridos lektores? Aki una otra dicha ke me plaze. Es de Ernest Legouve: “Los amigos sinseros son paryentes eskojidos. I, aki, lo ke tiene dicho Emile Augier: “Los paryentes los somportamos ma, los amigos los eskojemos”. Solamente, en esta sitasyon el verbo somportar o suportar me deranjo keridos amigos. Ya es verdad ke no eskojemos muestros djenitores ma los tenemos en el korason i sovre muestra kavesa…
Bueno, En la vida de una manera o otra, todos tenemos menester de apoyo, de fuersa moral i en vezes puede ser materyal. En una manera, menester de fiarmos a unos. Komo lo disho Montesqieu, “Kuando me fio a alguno, lo ago sin rezerva. Ma, me fio a muy pokas personas”.
Los amigos muestros, mas o menos son komo una indikasyon presyoza para los ke mos keren djuzgar. Pueden dar una idea sovre muestras preferensyas. No es en vano ke se dize: Dime ken frekuentas, te dire ken sos. Por terminar, unos kuantos versos ke eskrivi antes munchos anyos.
LA AMISTAD
Si la amistad tiene valor para ti,
Ven un poko, sienteme a mi.
En eya no egziste egoizmo.
Kerensya i entendimiento,
Mos da konfiensa i felisidad.
A tu amigo kerelo i bushkalo,
Oye su problema, entyendelo,
Si esta malorozo remarkalo,
A la okazyon, un chiko afalago,
Alegra el korason en toda edad.
La amistad es presyoza savelo!
No te rompas por un si, un no,
Es sakra, amigos veros lo saven,
De anyo en anyo la enfortesen,
Kon kerensya i fidelidad.
Coya Delevi 2003 Estambol.
