Este anyo el Dia Evropeo de la Kultura Judia se va selebrar Alhad, el 5 de Noviembre en el Muzeo Judio de Estambol. Va aver munchas aktividades kulturales komo prezentasiones, konsertos, egzibisiones, folklor i teatro (una boda judia simbolika). Todo esto en varios salones de la Sinagoga Neve Şalom i el Muzeo Judio de Estambol. El eskopo de este dia es azer konoser la kultura judia a las komunidades non-judias i espero ke este anyo va aver lugar para los non-judios! Uvo munchos anyos ke miembros de muestra komunidad incheron el salon ande se izo la boda simbolika i no uvo lugar para las personas ke vinieron para ver i konoser! Reushita buena a todos los partisipantes.
