Jerry Lewis era una persona spesyal de komedia en el sinema. Su nombre verdadero era Joseph LEVITCH. Nasyo en, 16/03/1926 en New Jersey en una famiya djudiya ke emigro de la Rusia. El padre se yamava Daniel Levitch i la madre Rachel. El empeso su vida de shena (sahne) kuando teniya sinko anyos, en los oteles chikos de New York.
Despues ke termino el liseo en New Jersey, empeso a azer komedias en las shenas.
En el anyo 1946, formo un duo (ikili) kon el kantante (şarkıcı) i artisto (oyuncu) Dean Martin. Endjuntos formaron una ekipa de komedia. En kurto tyempo entraron entre los komedyenes famozos del pais. Jerry Lewis en los anyos 1960, fue uno de los komedyenes konosidos i amados. Kon sus djestos i mimikes, kon su fason komo un torpe (sakar), kon su repuesta lista (hazır cevaplılık) toda la odiensa (seyirci) lo kijo bien. El desho el sinema en 1970.
En los anyos 1990, djugo en los filmos mas chikos. En los filmos Arizona Dream i Funny Bones en 1995, en la dirijensa de Emir Kusturica: el djugo en los roles komo ayudante.
Komo teniya una hazinura de korason, no izo el servisyo militaryo.
Tomo munchos premyos. En 2006, tomo el premyo de la Legion d’honneur ke fue oferta por el Ministaryo de Kultura de la Fransia.
Izo i munchas byenfesensyas. Del anyo 1952 a 1966 fue el dirijente de una fondasyon sovre los problemas muskular (kas sorunu).
El fue el pioneryo (öncü) para los hazinos ke tyenen problemes muskulares i arekojo 2 milyares de dolares komo donasyon.
Tuvo sesh ijos del primer kazamyento.
Kero sitarvos unos kuantos de sus filmos famozos.
1949 – Mi amiga Irma
1950 - Mi amiga Irma se esta indo al oeste (batı) 1952 - Marineros alegres (Şen Denizciler)
1953 - La plata de kaza1955
1956 - Asosiados desonetos (Çapkın Ortaklar)
1960 - El levantador (Asansörcü)
1961 - El ombre kon las mujeres.
Teniya munchas kalidades. Era espesyalisto en todo modo de arte.
El era: actor, komedyen, kantante, sineaste (film yapımcısı), el dirijente del filmo i senaristo.
Mos aziya riyir sin ke su ekspresyon troke. Azer riyir el den frente es un arte spesyal. Le plaziya partis, avlar, burlar i baylar.
No le plaziya asistir a los funerales.
La vida de este komedyen konosido en el mundo entero, se selebro en Las Vegas antes una semana.
Una persona ke no se va pueder olvidar nunka…
Ke su alma repose en Gan-Eden…
