Estamos bivyendo la fin del enverano, el mez de Septembre. En Mayo, mos espertimos una demanyana, kon un sielo klaro, un sol briyando. Un poko otro va ser la kontra. Madrugadas freskas i mas eskuras las demanyanadas. Puedemos suetar la byenvenida al otonyo.
La verdad, yo no puedo konsever ke esta sezon seya sinonimo de melankolia para unos. No kero egzajerar en empleando el byervo “tristeza.” Un poko de ayre, un sielo eskuro i luvyozo no deven trokar muestra umor. Prefero, a la kontra, pensar ke la sivdad se va arrebivir. Konsertos, ekspozisyones, okazyones de ver los amigos ets…
Estambol esta bivyendo el mez de Septembre, toda la prisa del empesijo de una sezon i naturalmente, la avyertura de las eskolas. Esto se esta konstatando de munchas maneras. Antes de todo, el trafiko! Ya empesimos a oyir de mas en mas, klaksones, sinyo de la despasensya de los konduktores. Los kaminos serrados, muchidumbre asperando en los terminales i tambyen, los otobuses kargados… Estas son las vizyones abitualas de muestra sivdad.
Poko a poko las vitrinas estan trokando de facha i de produktos. Estamos vyendo trokamyento en syertas vedruras (legumbres). Ma, no se puede dezir ke ay muncha diferensya. Invyerno estamos topando kaji, todos los legumbres de enverano, ke no syento el menester de enumerar!
Otonyo, kon sus ayres i sus luvyas… Las ojas amariyas o ruvyas, bolando sovre los trotuares, mesajeros infayivles de la sezon… I, las luvyas ke mos van apanyar en supito. En vezes, el sol va topar un pasaje entre las nuves, i, un poko timido, mos va amostrar su kara para alegrarmos! Miles de pasharos migrantes, se estan aparejando a abandonar la sivdad. El ritmo de la natura esta lavorando sin marearse, sin falta, komo una makina byen montada, una komputadera byen programada.
Portanto, Septembre no es la fin del enverano. En el Sud, se esta dayinda bivyendo el enverano, yeno, yeno. Es una grande oportunidad de vakansas para los ke no izyeron dayinda. Seguro si no tyenen algun impedimyento de lavoro urjente o eskolas… Es una sezon konsiderada komo muerta, i de este punto de vista, se puede azer vakansas mas ekonomikas i mas kalmas.
En Septembre, ay un djenero de melankolia en syertas fizyonomiyas, en el aver. Kale pensar ke, komo todo, i estos diyas son pasajeros. Los arvoles de muevo van a enfloreser, los pasharos van a tornar, la natura se va renovelar. I la Primavera, otra una vez va dezir: yo ya vine! Solo kale asperar. Porke ay un chiko pasaje, bastante yelado, un poko mas eskuro, ma portanto, en vezes blanko, kon su karpeta de inyeve. I, seguro, kon sus friyos i furtunas: “el invyerno”… No se dezea muncho salir, ay en vezes una haraganud i puede ser otras kozas ke no kero afilu nombrar, ma, todo pasajero…
Lo mas derecho es de no egzajerar los problemas, de bushkar okazyones de kontentes, sin olvidar ke la Primavera esta detras de la puerta. Azed la prova, i pensad ke el invyerno, es la “antishambr” de la Primavera, i kale pasar por ayi, para alkansar a los diyas ermozos. Solo, un poko de pasensya. Tambyen, esta sezon, el mez de Tishri, tyene otras ermozuras, otras partikolaridades para mozotros, los Djudios. Es el mez de las fyestas, de selebrasyones, el empesijo de una mueva anyada. Oganyo, el mez de Septembre renferma una partida del mez de Elul i otra de Tishri ke es el mez de fyestas i de selebrasyones. Es el empesijo de una mueva aynada para mozotros.
Sueto ke el muevo anyo 5778 seya manadero de favores divinas, de paz i repozo para el Universo. SHANA TOVA-HAG SAMEAH.
