Mi granpapa Salomon Kazes ke respektavamos, era muestra idolo i mi luzya gramama tambien... Avia fraguado una kaza maraviyoza, grande para pueder reunir los ijos en esta mizma morada serka de la mar. Kada uno asperavamos impasiamente el enverano. Mis onkles, mis tantes i mizmo los inyetos, mozotros, morimos en la kaza. El arshitekto valorozo era el onkle Pepo, ermano de mi granpapa, ke avia estudiado en Alemanya.
Mi kerida tante Marie, tu gramama, i mi kerido onkle Rafael, ermano de mi granpapa ke yo amava partikularamente. No me olvido de su kerensia i su fineza de saver ofreser los regalos prensieros... veniyan a vermos kon ti en los brasos. Tu eras muy chiko.
Puedes kontarme tus suvenires?
Yusuf, te akodras de Caddebostan serka de la mar Marmara, kon los balkones i la guerta grande yena de arvoles de fruta, ke no mankava ni uno i los parfumes de las flores de azaleas i hanimelis i yasemen?
Yo me akodro de mi chikez kon solo un enstantane: Estava mirando de la ventana de la kaza ande estavamos morando. Avia unos trames ke se estavan aboltando uno detras de otro. Parese ke esto era en Altıncı Daire en Şişhane.
Un anyo despues, estavamos en Şaşkınbakkal en enverano. La guerta estava yena de balsas i de lodo. I el vizino de arriva dizyendo: “Zeldika, il y a de la boue”. La balabaya de kaza era una ruvya, se yamava Mme. Balon. Tenian un gato vyejo nomado Sariko ke me avia areskunyado munchas vezes.
Kuando tenia sinko anyos, akel enverano alkilimos una kaza en Yeniyol. Aya en Hamam sokak avia una damma, Mme. Miranda, kon siete kreaturas i eyas me aharvavan kada diya.
Un anyo despues izimos terfi (promosyon) a una kaza ensima la kaleja sentral Bağdat Caddesi. Teniyamos komo vizino la Meshkita de Erenköy i el manav İlhan. El avlava un poko en fransez, i me avia echo una kuna entre dos arvoles de ande me kayi munchas vezes!
La tante Violette, tu madre, la prima intelektual, era amada por la famiya, aprontava kada anyo un Göç (egzodyo) de Estanbol a Erenköy.
Si, kuzin Esti, el hamal Shemuel se okupava de todo i me aziya espantar en diziendo: “Te va matar”.
Ma mi madre tuvo muncho mazal. Tenia una kuenta en la Türkiye Kredi Bankasi. Avia ganado un apartamento de la loteria de la Banka en Ethem Efendi Caddesi en Erenköy.
Tambien morimos en Pangaltı. El patron era una negra persona. En invierno un dia en un pleto, se arezvalo mi Granpapa de las eskaleras ma esto okaziono de ser patron de su morada.
Teniyamos dos kazas, Baruh Ashem. No teniyamos menester mas de azer göç i trokar i alkilar kazas diferentes.
Avia karosas ke viniyan i mos tomavan de kaza para yevarmos a la plaj de Caddebostan, el lugar de Orhan. Tenian solo un kavayo. Me akodro de un kavayo ke kijo modrer a mi mama! “Ayşe” era nu nombre...
Estas arabas, Yusuf, se yamavan TALİKAS. Eran para ir sovre todo para azer piknik, las famiyas, ijos, inyetos, kon los aparejos savrozos de kaza, las borekas, boyos, dolmas, plakis, ets. El karpuz al pozo por mantenerlo fresko...
La guerta vizina era muy grande, avia kaji 50 arvoles de pinos i las kreaturas pasavan la pared para arekojer pinyones. El jardinero korriya detras de mozotros, ma mozos mos burlavamos diziendo:
“Bahçıvan, bahçıvanın karısı, yumurtanın sarısı.”
(Jardinero, la mujer del jardinero, el amariyo del guevo.)
Este mizmo anyo empesi a la eskola Talat Paşa ke era a la fin de la mizma kaleja. El primer dia de la eskola, tanto me espanti ke no kije deshar a mi madre, se estuvo kon mi en la klasa kuatro oras para abafar los yoros miyos.
Avia un lugar al bodre de mar ke se yamava el “Kafiko de Mehmet”. El era medyo loko, dizia: “Aki travar un OH del aver ya abasta para pagar 50 groches”.
Fin de semana mos ivamos kon treno a Pendik ke era la fin de Estambol alora, en la parte de Anatolia. Avia i Yakacik para vijitar i bever aguas freskas de los kantaros para chuflar.
En kurto se eskapo la eskola primera. Estudyi despues en Saint Michel sin azer klasa préparatoire. Se avlava en Fransez en kaza i de Mme. Nektar aviya tomado lisyones de fransez.
Fina la fin de la eskola fuites el primer de la klasa, eras un buen elevo...
En 1960 uvo una revolusion en el pais. Mas de nada no se estava avlando en las kazas.
Un dia en un restorante avia un gato ambierto. Le di un poko de karne kon mustarda. El povereto, flamas le salieron de los ojos, travo el mantel, se rompieron munchas pinetas. Pagimos el danyo i resivi una buena haftona de mi madre, ke esté en Ganeden, un chaketon para kada pineta.
Fin de la primera episoda...
