La sanedad no es solamente no tener hazinuras; es estar en una situasyon perfekta sovre los puntos fizikos, mentales i el byen estar sosyal.
La sanedad es un fakto sosyal porke:
Los elementos ke forman la sanedad son sosyales.
Las razones ke kreen la chika salud (sağlıksızlık) son sosyales.
Entonses;
La solusyon de tener la salud buena es sosyal.
Estamos bivyendo una vida kanseryoza, kon problemes en todos los puntos de vista i estamos syempre en relasyon kon munchas personas, ijas, ijos, maridos, madres, padres, amigas, amigos…
Es verdad ke los evenementos influensan (etkilemek) la sanedad. Para pueder entender la persona, para pueder apresyar la hazinura u la sanedad de la persona, kale saver las relasyones ke tyene kon su entorno.
Una persona sana tyene estas partikularidades (özellik):
- Una enerjiya bastante para no enfluensarse del stres de kada dia.
- Una atitud (davranış) pozitiva kon el optimismo endjuntos, i en tomando una desizyon ser kerensyozo.
- Ser kalmo en las situasyones urjentes (acil),
- No inyervarse a todo modo de kozas,
- Ser syempre en mizmo nivel (seviye) de komporto.
La sanedad de la persona es la valor la mas sakra en el mundo.
Malorozamente la persona entyende la valor de la sanedad kuando la perye.
A mi idea, la kanserya, los penseryos i no pueder solusyonar los problemes, son faktos ke influensan negativamente la sanedad.
No dar emportansa a nada, no pensar muncho, deshar todo asegun es (olduğu gibi), es la solusyon de estar en ekilibro (denge).
Los korasones son resiprokos (karşılıklı). Una persona ke kere byen a todos, es amado por todos.
Por ser amado, kerer byen al den frente i dar la valor menesteroza es lo mas emportante para mi. Para pueder partajar las alegrias i las tristezas tenemos menester de kerer byen i de ser amados.
Azer piadades, tener afeksyon al den frente son los sinyos de la kerensya.
Las palavras de kerensya son moralmente un trezoro para la persona. La kerensya es un sentimyento ke tyene komo baza, el devuamyento, la afeksyon i la piadad.
El sistema immun (bağışıklık sistemi) es un sistema ke proteja el puerpo kontra las enfermedades.
Para protejar este sistema kale:
- Komer syempre komidas freskas,
- Las kumidas no deven ser ni muy kayentes, ni muy yeladas,
- Mashkar bueno i komer muy avagar,
- Komer una koza dulse kuando estamos kansados.
Para pueder protejar muestra salud psikolojika kale:
- Ke mos ambezemos a abasteser kon lo ke tenemos.
- Estar leshos del stres i de las tristezas.
- No tener selo del den frente.
- Ser positivos en todo modo punta de vista.
- Tener un echo u un hobi.
- I finalmente kerer byen al den frente, i para ser kerido, ser amado azer todo el posivle.
