Vengo de resivir del grupo nombrado “Muestros Dezaparesidos” ke agradesko de alma i korason, el teksto sigyente eskrito en Franses i sinyado de parte de Leon Tolstoi ay mas de un siglo, en el anyo 1891, teksto ke me vo esforsar de traduzir lo mas fidelmente posivle al djudeo espanyol:
Kualo es un Djudyo?
Leon Tolstoi 1891
Esta kestyon no es estranya si egzaminamos esta kriansa libre ke fue asolada i oprimida, trespizada i persigida, kemada i aogada de parte de kaji todos los dirijentes ansi ke de todas las nasyones, i ke kedo biva i prospera malgrado el odyo i la irra de todo el mundo.
Kualo es un djudyo ke no kapitulo ni aboko kavesa delantre todas las tentasyones mundanas ofresidas de parte de sus opresores i persekutores afin ke renunsye a su relijyon i a la Fey de sus djenitores?
Un djudyo es un ‘Ser umano sakro’, riko de la flama eternal del Syelo… El arrelumbra la tyerra i sus abitantes.
El es la primavera i la fuente de la kuala las otras nasyones ekstraeron sus relijyon i sus kreensas. Un djudyo es el pionero de la kultura. Desde los tyempos inmemoryavles, la inyoransa era imposivle en el payis ke nombramos “la Tyerra Santa”.
En los tyempos leshanos ande la Vida i la Muerte de una ‘kriansa umana’ no valia grande koza, Rabbi Akiva se pronunsyo kontra “la pena de muerte”, la kuala es (ainda oy) konsiderada komo un kastigo akseptavle en nombrozas nasyones ke pretenden ser sivilizadas.
Un djudyo es un pionero de la “libertad”. En los tyempos antiguos, kuando la populasyon era dividida en dos klasas diferentes: “los shefes” i “los esklavos”, Moshe Rabenu prohibyo de guadrar i de konsiderar una persona komo esklava mas de 6 anyos.
Un djudyo es el simbolo de la toleransya sivil i relijyoza, tal lo ke mos dize el livro Santo: “… Devesh manifestar i mostrar vuestro amor por el Estranjero ke se topa en vuestras paredes, porke i vozotros fuitesh estranjeros en el Payis de Ayifto”.
Estas palavras fueron pronunsyadas en un tyempo barbaro ande (entre las nasyones) era akseptavle de arrebashar i someter los otros.
Konsernando la toleransya relijyoza, el Djudaizmo es leshos de bushkar a asimilar muevos myembros. Al kontraryo, el Talmud deklara ke si uno ke no es djudyo kere konvertirse a la Fey djudia, kale eksplikarle a ke grado es difisil de ser djudyo i dizirle “ke tambyen los djustos de otras relijyones meresen de mezmo de eredar del Reynado Seleste”.
Un djudyo es un simbolo de la eternidad. El Djudaismo fue syempre ‘la Nasyon’ ke nunka ni la gerra ni la tortura pudyeron eksterminar, la nasyon ke ni el fuego ni el pasaje de muevas sivilizasyones ayegaron a eliminar de la superfisia terresta. El Djudaizmo fue la Nasyon ke la primera anunsyó la Palavra de Dyo, la Nasyon ke prezervo la Profesia desde un tyempo leshano i ke la transmetyo al resto de la Umanidad… Una Nasyon semejante no puede dezapareser.
El Djudaizmo es eternal, el es la inkarnasyon de la Eternidad. (Sinyado por Leon Tolstoi)
A kontinuar sovre un otro tema.
