Un DIA de ALHAD en GALATA Un chiko moabet

Coya DELEVİ Judeo-Espanyol
21 Haziran 2017 Çarşamba

Alhad, el 11 de Junyo estuvimos prezentes en la seremoniya de kazamiento de las oras 17.00. Sin egzajerar puedo dizir ke fue un reel regalo para muestros oyidos. En este momento no se si los otros amigos, amigas ke vide aya eskrivyeron sovre esto. En fin de kuento, no es ke se trata de un evento i no ay una razon… I yo mizmo, no penso de avlar por la boda syendo ke muestro sujeto es Galata (otruna vez!!).

La sola koza ke puedo sinyalar es muestras kayentes relasyones familial kon el Novio i su famiya ets. Una chika endikasyon: es primo ermano de mis inyetos i lo keremos bien seya mi marido, seya yo. Es komo muestro inyeto. Bueno, despues de esta introduksyon avlaremos un poko por Galata o, mas egzaktamente por la KULA.

 Reelmente ya aviya muncho tyempo ke no estava vijitando el Sentro i Alhad estava el dia favoravle para dar un torno. Profitando ke mankava bastante tyempo para la Seremoniya, desidimos de dar un torno en el Sentro. Puedo dizir ke fue la primera vez ke no fui a vijitar mi ansyana morada, el famozo Saffet Bey Apt.

Bueno, estavamos djusto en el empesijo de la kalejika ande se topa la entrada del Pasaje Salti. La kaleja troko enteramente de facha. En kada paso vimos seya una kafeterya o kafe, unas kuantas botikitas de suvenires i antikaryos. Ma, la reel sorpreza fue kuando salimos a la Plasa de la Torre. De enfrente vimos un “medyo de lokomosyon”, en su reel dimansyones. Ma, no esto sigura de afirmar ke es un otobus o tramvay. Aviya tanto puevlo en el derredor ke fue imposivle de aserkarmos.

Otrun lugar ke no pudimos aserkarmos fue el “Kafiko de la KULA”, asigun dezinyavamos la guerta djusto enfrente de la entrada de la Torre. Este lugar tiene una valor importante entre mis rekuerdos. Anyos antes, los anyos 40-50 ke me akodro muy bien eskrivi bastante por GALATA. Despues ke mi kerido Papa zl. torno del servisyo militar de las 20 klasas, su lugar preferido de asentar era este Kafe. Kada tadre despues del dia kanseryozo de lavoro, viniya asentarse aki i repozarse. Su bevyenda favorita era un gazoz. No fumava, no djugava a kartas, de sorte ke no tuvo  entrado aryento, al lugar serrado del Kafiko…

Esto eskrivyendo este teksto oy, Shabbat 17 Junio. Amanyana, treser Alhad de Junio se selebra el Diya del Padre. Todo en syendo un dia muy ansyano, mas de un Siglo, aki lo ampesimos a fyestar muncho mas tadre. Tambien, los istoryanos afirman ke en la Roma Antigua egzistiya un dia semejante de selebrasyon. Yo syempre tuve la impresyon ke el Diya del Padre, muncho tyempo kedo en la solombra del Diya de la Madre. Esto sigura ke entonses, esto ya troko.

Esperando ke amanyana Alhad vamos a tener un tympo favoravle, tengo la entisyon de dar un torno en la Kula i asentar en el kafiko de mi Papa. Asigun mi, esto va ser la mijor manera de nombrar mis djenitores…