Una de las fyestas las mas emportantes de los djudyos: ‘Shavuot’ kontyene munchos nombres.
• La kavza de la egzistensya de los djudyos, el Dyo, ke dyo la TORA i los ‘10 Komandamyentos’ en la montanya de Sinai a Moshe Rabenu.
• Festival de las semanas,
• Fyesta de las frutas,
• Fyesta de la rekolta.
Shavuot es una fyesta emportante porke; es la sigunda despues Pesah, de las fyestas ‘Şaloş Regalim’ ke son Pesah, Shavuot i Sukot.
Shavuot no se fyesta syete dias komo Pesah i Sukot, se fyesta dos dias solamente, porke es la selebrasyon del puevlo de Israel ke aksepto la TORA (el orijen de la vida - yaşam kaynağı) todos aunados komo un korason.
El buto de la nasyon djudiya (Yahudi ulusu) es de servir el Dyo. El kamino de servir es de ambezar i de pratikar la Tora… Kon los dyes komandamyentos ke son:
1- Yo so el Dyo ke te kiti de Ejipto i te salvi del esklavaje,
2- No vas a tener otro Dio aparte de mi,
3- No vas a utilizar el nombre del Dio sin menester,
4- El dia de Shabat va ser syempre sakro para ti, vas a lavorar sesh dias i te vas a repozar Shabat ke es el dia Santo; dingunos de tu famiya no van a lavorar mizmo tus mosos, mosas...
5- Vas a tener respekto a tu madre i a tu padre,
6- No vas a matar a dingunos,
7- No vas a mirar a la mujer del den frente,
8- No vas a arrovar,
9- No vas a testiguar (şahitlit etmek) avlando mentiras,
10-No vas a mirar a las kozas ke no te apartyenen...
La semana pasada se fyesto komo kada anyo en la sinagoga Italyana kon la prezensya del Grande Rabino, Rav Isak Haleva i el presidente de la komunidad Ishak Ibrahimzadeh en una atmosfera alegre kon las “Estreyikas d’Estambol” ke kantaron kon sus bozes de seda.
El Dyo ke mos ayege para kada anyo kon salud buena, parnasa, reushidad i pujados i non aminguados, AMEN…
Shavuot ya es el sinyo del empesijo del enverano.
El tyempo ya se kayento, la semana vinidera las eskolas ya se van a serrar para las vakansas.
El enverano es una sezon ke se bive kon muncho gusto i alegria despues de la primavera. Los dias se alargan, las noches se akurtan, la natura es yena de munchas kolores diferentes, se oye kantar los pasharos, las yervas se engrandesen, las flores enfloresen en los kampos, i las personas se syenten mas orozos de todo modo de evenimiento, porke esta sezon plaze a todos.
Munchos de mozotros se van a las islas, munchos viajan, i los ke se kedan en la sivdad, se van a la mar, todo el tyempo pasa afuera, en las kayes...
Se ampesa a vender las frutas del enverano ke son: las serezas, uvas, kayisis, avramilas, moras i otras.
El enverano arekayenta la persona. La natura se arribive, la kolor de las vedruras i del syelo, la mar, todo el entorno yeno de kolores bivas, ke alegran a la persona i se deviene mas pozitivos, i mas optimistos.
El sol del enverano mos arekayenta i mos aprovecha.
Puedemos profitar de los banyos de sol ke son yenos de vitamin D, kuran los romatizmos, los vitamines ke son emportantes por el desvelopamyento de los guesos se arrekojen del sol. La agua de mar es sana para munchas hazinuras del kuero i mos arribive, mos da una enerjiya de bivir orozos.
Kuando vyene el enverano las personas se syenten mas repozados, kalmos i kon ardor de bivir.
Los dias yeno de sol mos aklaran el korason, despues de los dias del invyerno largos, areskuros i yelados.
Las frutas i legumes del enverano son rikos de munchos vitamines i minerales ke es emportante por la salud de la persona.
Por egzempyo;
• El karpuz es yeno de vitamines i minerales i tyene una kapachitad grande de antioksidan.
• El kayisi kon el sheftali son yenos de potasyum i de vitamin C.
• La tomat proteja la sanedad del puerpo i del meoyo de los aedados.
• La sevoya proteja la persona de las enfeksyones i kontra la hazinura maldicha: el kanser.
No kreygo ke ay personas ke no les plaze el enverano…
