Fueron muy dolorozos i empapados de inkyetud los dias de la semana pasada en un mundo kondanado a bivir syempre en una atmosfera eksesivamente kayente, i moralmente echa de dubyo i terror komo fue shabat pasado a la noche en Londra.
Este de alkavo atake terroristo fue el segundo en la Inglatierra en el espasyo de unos kuantos dias i eyos dos kostaron la vida a nombrozas personas por la mas parte jovenes ke ainda se topan en el umbral de la vida.
Ma vendremos de muevo al primer problema, al de una atmosfera mundyal de dia en dia mas kayente sin reelmente topar una verdadera solusyon ke kontentara la totalidad del mundo.
Komo por seguro munchos de los lektores se akodraran, en el anyo 2015, relativamente poko antes la fin del mandato governomental de Barak Obama, nombrozos payizes del mundo entre los kualos byen entendido, prioritaryamente los Estados Unidos i tambyen la Fransya, la Italya, la Almanya i otros governos Evropeos ansi ke Aziatikos i Afrikanos tal la China, las Indyas ansi ke la Afrika del Sud, avian sinyado debasho la Autoridad Prezidensyal Amerikana, una deklarasyon kolektiva konfirmando la nesesidad absoluta de eskojer un modo de vida ke permetera a las jenerasyones futuras de bivir en un espasyo atmosferiko ande respirar no sera un suplisyo.
Lo ke aze de kada persona “una verdadera kriansa pensante” no es unikamente su kapachidad de asumir la responsabilidad de su propya egzistensya ma tambyen el kudyo de lo ke sera en los tyempos a venir, la vida de sus desendyentes.
Es por esto ke Vyernes pasado, ‘la indinyasyon del mundo i partikularmente de los grandes payizes evropeos kontra el aktual Governo de los Estados Unidos’ fue muy grande dospues su anunsyo de retirarse de la desizyon tomada en Paris en el anyo 2015 de “salvar la kondisyon atmosferika del mundo, sea mizmo al detrimento de la evolusyon industrial”.
El objetivo prinsipal del aktual Governo Amerikano dirijido por Donald Trump es de realsar lo mas posivle el poder ekonomiko i militaryo del payis, afin de kedar syempre la mas fuerte Potensya del universo i esto en syendo konsyente ke este ekseso industrial no es solo una simple falta moral ma un verdadero krimen kontra la Umanidad futura.
Barak Obama” el kual poko antes la fin de su mandato avia konfirmado kon fervor el akordo de Paris konsernando la lucha kontra un rekayentamyento atmosferiko muy perikolozo, fue (se entyende byen) uno de los primeros a manifestar su reaksyon negativa kontra la aktual desizyon amerikana de travarse de este pakto istoriko.
En efekto, mizmo si los rezultados obtenidos durante el mandato prezidensyal de Obama no fueron syempre muy briyantes, todos savemos ke la responsabilidad no le revyene personalmente ma inkumbe al Parlamento majoritaryamente Republikano ke se obstino a refuzar i mizmo a obstruir la realizasyon de todos los projektos ke el presedente prezidente prezentava, tal ke fue el kavzo por la “seguridad de enfermedad” ke el se esforso de akordar a la mayoria de los ke no la posedavan.
Revinyendo a la ultima desizyon del muevo Prezidente Amerikano, devemos notar ke Jerry Brown, Governador de la Kalifornia, deklaro su intisyon de korrijir el yerro de la aktual desizyon governomental en la lucha kontra el trokamyento klimatiko.
Vyernes pasado, Jerry Brown (aedado de 79 anyos) se rendyo en China para una vijita de la kuala el motivo prinsipal era djustamente la importansa de la kualidad atmosferika del ‘Medio Ambiente’ ande la populasyon se topa.
El disho “Donald Trump eskojo la solusyon la mas negativa ke sea. El no tyene razon i la Kalifornia va rezistir a esta desizyon ke es yerrada i illojika…Trump dezerto ma la Kalifornia es pronta a kombatir.
A notar de mezmo ke el Governador de New York tambyen ansi ke munchos otros de grandes sivdades Amerikanas, refuzaron de renyegar la desizyon tomada en el anyo 2015.
