El fasikul preparado por la FONDASION PARA EL LEGADO DEL MURO OKSIDENTAL, mos aze saver la importansa DEL MURO OKSIDENTAL.
Durante los ultimos 2000 anyos, el Muro Oksidental se konvertio en el sentro de la memoria judia. De akordo a la tradision, la Presensia Divina nunka abondono el muro ke fue konstruido para kontener el lado oeste de la Esplanada del Monte del Templo, ke se yama Hakotel Hama’aravi en ebreo.
El punto kulminante del Monte, fue kuando Salamon konstruyo el Templo, sovre la era de su padre, el rey David.
El Templo es sagrado por la razon ke muncho antes ke se fue establesido en este monte, ABRAHAM vino aki para sakrifikar su ijo. Entonses era konosido komo el MONTE MORIA.
Sus antiguas piedras son el testimonio de un gloriozo pasado judio. Es el uniko vestijio del Grande Templo ke sovrebivio a la destruksion de los romanos.
El orguliozo legado i su renasimiento nasional ekstraordinario, despues de 2000 anyos de egzilio, es el fokus de los andjelos i las plegarias judias por la redempsion i la renovasion.
POR KE EL MONTE DEL TEMPLO ES SAGRADO?
El Templo fue destruido por el konkistador babilonio Nabucodonosor, en el anyo 586 A.C. i rekonstruido 70 anyos mas tadre. Herodes lo restoro rendiendole su gloria orijinal, aze unos 2000 anyos. Su esplandor era tal, ke se dizia:
“Ken no vido el Templo de Herodes, no vido un edifisio de verdadera belleza en su vida”.
En el anyo 70 E.C. dicho Templo fue destruido por los romanos. Malgrado ke este fue kemado kompletamente i sus piedras dispersadas, el Muro Oksidental se mantuvo intakto.
KE SINYIFIKA EL TEMPLO PARA JUDIOS I NON JUDIOS?
El profeta Isaias yamo al Templo: “Una kaza para todas las nasiones”.
Siendo un sentro universal de espiritualidad, despierta refleksiones i emosiones entre Judios i non Judios i refuersa el atadijo intimo entre el individuo i el Dio...
Malgrado ke el Templo fue destruido, la sanktidad del lugar es tal ke kontinua a ser sagrado i spesialmente para Judios, es un lugar sentral: Kada jenerasion orienta sus orasiones verso este sitio. Oy personas de todas partes del mundo, se reunen aki para kontemplar, sentir i orasionar, en mismo tiempo ke apozan notas, demandas i suplikas entre las piedras eternales.
KE ES LA PLAZA DEL MURO OKSIDENTAL?
La plaza del Muro Oksidental es la grande Esplanada avierta, enfrente de un sektor del Muro Oksidental.
Este espasio permete por un lado, un dinyo akseso a este sitio sagrado, i en mismo tiempo sierve komo lugar de seremonias publikas.
La Bendision de los Saserdotes (Birkat Hakohanim) durante las festividades de Pesah i Sukot (Tabernaklos), el juramiento de los muevos rekrutos de la polisia i de la armada, ansi komo las seremonias del Dia de Komemorasion de los Soldados Kaidos i del Dia de la Reunifikasion de Yerushalayim.
La Esplanada es tambien un sitio popular para la selebrasion de Bar-Mitzva de jovenes de Israel i la diaspora, ansi komo el sitio ofisial para las seremonias de Bar i Bat-Mitzva de los jovenes viktimas del terrorismo.
Asta antes unos 700 anyos era posivle de akseder a todo el Muro Oksidental. Poko a poko los konkistadores mamelukos i musulmanes fueron konstruyendo a su lado. Los Judios ke kerian kontinuar a orasionar ayi, devian pasar por estrechas kalejas asta yegar a el. En 1948, los Jordanos okuparon la sivdad vieja de Yerushalayim i defendieron el akseso de los Judios al Muro.
Kon la reunifikasion de la sivdad en 1967, el Muro retorno felizmente al puevlo Judio, la Esplanada fue avierta i se fasilito el akseso a todos los vijitantes. El Muro se transformo en un sitio singular de orasion i en un simbolo de la unidad nasional Judia.
ES POSIVLE DE VER EL MURO OKSIDENTAL DESDE LA ESPLANADA?
Solo 57m. de los 488m. del Muro limita kon la Esplanada de Orasiones.
Aproksimamente otros 81 metros se ekstienden a la derecha del vijitante - de kara al Muro - i otros 350 metros a la siedra, verso los Tuneles del Muro Oksidental, enfrente del Muro.
KE TIENE DE ESPESIAL ESTAR DELANTRE DEL MURO OKSIDENTAL?
Todos son iguales delantre del Muro. Los Judios sienten aki, en algunos kavzos, sus judaismo por la primera vez.
Tokar sus piedras mos ata a muestra nasion i legado, al Puevlo Judio i a muestra larga i turbulente istoria.
Estando delantre del Muro, las perspektivas, los pensamientos i las sensasiones se konsuman i lo insinyifikante se desvanese. El muro resistio al tiempo; fue testigo de epokas de gerra i epokas de paz, de destruksion i renasimiento.
Durante jenerasiones se oyo las orasiones, i el eskarinyo de proksimos i distantes. Oy es el sitio mas vijitado de Israel.
Si dezea sentir, entender i bivir una eksperiensa intima i singular, ke vijite el Muro Oksidental, el korason de Yerushalayim.
www.thekotel.org
MUED ALEGRE - PARA KADA ANYO MIJORADO!
