La grande Organizasyon Turka “Forum Istambul” kompuesta de myembros muy byen konosidos entre los kualos, grandes ombres de echo i fabrikantes ansi ke prestijyozos burokratos, profesores de varyas universidades, selebres medikos, avokatos, arkitektos, eskritores ets… ets… se reunise kada anyo en data del kuatro i sinko Mayo para eskojer i desidir a ken atribuir el Premyo titolado “Ömür Boyu Başarı Ödülü”, el kual esta vez fue konsedido a muestro kerido korelijyonaryo, Sami Kohen, djornalisto muy estimado en Turkia i igualmente en diferentes otros lugares por la minusia i la profundidad de sus analizis konsernando la politika eksteryor de muestro payis en sus varyas relasyones kon otras potensyas.
Ay 63 anyos ke el lavora sin interrupsyon en el djornalizmo, kaji syempre en el diaryo “Milliyet” del kual el es el veterano, lo ke (ermoza koinsidensya) konfirma el titolo mizmo del premyo “Ömür Boyu Başarı ödülü” ke le fue atribuido.
Sami Kohen aze onor a la Turkia ke syempre el sirvyo kon fidelidad i fervor, ansi ke a la komunidad djudia de Estambol de la kuala el es uno de los myembros los mas valorozos.
Muestras felisitasyones las mas kalorozas i muestro intenso dezeo de verlo syempre aktivo i fidel a su misyon de djornalisto.
Es un fakto ke no se puede nyegar: “Kada persona ke kon sus aktos, ovras i fidelidad a los konseptos umanitaryos, se afirma de una manera muy pozitiva durante su vida” realsa el nivel sosyo intelektual de la esfera ande se topa.
