Turkish Passaport

Paris fue okupado por los alemanes al empesijo de la Sigunda Gerra Mondial. Kon la kolaborasion de Pétain, supieron aferrar 76,000 Judios Fransezes para embiyarlos a los kampos de konsentrasion.

Mi marido Viktor Saul i su famiya ke bivian en Fransia, fueron salvados grasias a sus pasaportos Turkos i grasias a mi esfuegra, ke este en Ganeden, bivda de edad de 30 anyos, korajoza, intelijente i akavidoza, ke se prezento al Konsulato Turko antes ke la Gerra empese, para salvar sus 3 ijos ke estavan enrejistrados en su pasaporto Turko.

Enkavesado por el Konsul de Marsilya, Necdet Kent, Selahattin Ülkümen, Namık Yolga, Bedii Arbel (ke su ijo fue un amigo de mi marido en Estanbol), Cevdet Dülger, Behiç Erkin, Fikret Özdoğancı, reusheron a savlar 500 Judios i embiyarlos a la Turkiya kon 8 vagones.

Despues de sesh anyos de grandes sakrifisios, de bushkidades, reportajes, montajes, el senario de este filmo se preparo en dos anyos.

Belgin Yolga, ija del Konsul Turko Namık Yolga, eksplika ke el dokumento o listas yamadas “HAYAT KURTARAN LİSTELER” se preparo en el Konsulato Turko situado en Bulvar Haussman en Paris.

Despues de ver el filmo, a la fin pude kestionar i azer avlar mi marido, uno de los aktores del filmo Turkish Passaport ke, en muestros 50 anyos de kazamiento, me privo de detalyos konsernando su egzistensia en Paris durante la Sigunda Gerra Mondial.

Ke pensas, Viktor, de este filmo dokumentario ke salio grasias a los ke kerian absolutamente realizarlo para demonstrar el koraje de la Turkiya a ayudar los Judios en dezespero.

Este testimonio del evenimiento esmoviente i trajiko bivido por los Judios durante el Olokosto, devia ser realizado muncho antes, porke asta oy, el mundo inyoro las aktividades diplomatikas del Ministerio del Eksterior Turko.

En lo ke mos konserna, mozotros los Judios, es kon rekonosensia i orgolio ke pudimos konstatar ke, malgrado todos los rizikos ke esto komportava, la Turkiya protejo sus suditos, komo se deve, mismo los “rezidentes al estranjero”.

No es chika koza, i es verdad ke el Servisio Diplomatiko Turko, tuvo una aktividad inkansavle i provechoza en munchos kavzos.

Dunke es muestro dever, mozotros los suditos rezidentes al estranjero, de propajar ke lo ke kedava del Imperio no era tan flako komo puedia kreer el mundo oksidental.

Es verdad ke frente a la krueldad germanika, la tolerensia i karakter akojidor de la Turkia no puedia kedar indiferente, i se komporto kon una efikasidad evidente.

De ayi se entiende ke el Servisio Konsular siguramente no prosedo de su propia inisiativa, ma ke sus aktos eran sometidos a la aprobasion del Ministerio del Estranjero Turko.

Es verdad ke dingun diplomato no puede tomar tala inisiativa, sin tener la aprobasion de su Ministerio del Estranjero. Oy realizo ke modo de akto eksepsional es, en las sirkonstansias de akel tiempo, de pueder obtener el uzo de vagones ke traversaron la Evropa entera para arrivar a la Turkiya.

Kon esto dicho: El filmo por siguro amostra solo lo ke keda komo rekuerdo despues de muncho tiempo, lo ke aze atenuar las imajenes, komo las kolores se deskoloran debasho de la luz del sol, i es kon amargura ke asistimos de muevo al pasado, grasias a la persistensia i la abilidad de los produktores seraristos.

Siertos miembros de la komunidad Judia Turka fueron sponsor de este filmo de kurtometraje.

Viktor, es verdad ke la Turkiya fue remarkavle?

Si, en verdad remarkavle. Asta la kreasion del Estado de Israel, los puevlos judios i muzulmanos bivian en las mismas rejiones en armonia, sin impedimiento ni animozidad. La prova es ke en 1492, el Imperio Otomano se kargo de abrigar i protejar los Judios ekspulsados de la Espanya.

Esto turo asta muestros dias. En Maroko, Tunisia, Ejipto, Iran, Lebano, en todos los paizes muzulmanos, avia Judios.

Es el Nasionalizmo Sosial aleman, o Nazismo, ke por razones afuera de mi entender, se komporto kon una krueldad sin presedente en el mundo.

Damos grasias a todos por este filmo, un DOKUMENTARIO UMANITARIO. Tambien rengrasiamos todos los miembros de muestra famiya, el Produktor GÜNEŞ ÇELİKCAN, el Direktor BURAK ARLIER, la Direktora del Projekto YAEL HABİF i el ekipo entero, i al grupo ke partisiparon al budjeto de la produksion.