La Fransya debasho la amenaza de ser governada por un partido ultra nasyonalisto

Klara PERAHYA Judeo-Espanyol
3 Mayıs 2017 Çarşamba

Desde Lunes el 24 April, un dia dospues la viktorya de “Emmanuel Macron” i de “Marine Le Pen”, loreatos del primer torno de la eleksyon prezidensyal, munchos eskritores de la Prensa franseza ekspresaron un djenero de inkyetud a este sujeto. Ke sera el rezultado final de la eleksyon prezidensyal del Syete Mayo 2017 ande dos kandidatos diametralmente kontraryos el uno al otro en sus ideal komo tambyen en sus valores umanas se enfrentaran?

Es ke el puevlo de Fransya se topa debasho la amenaza de ser governado por un partido ultra nasyonalisto ande enflorese munchas vezes un antisemitizmo sekreto bastante fuerte i un egosentrizmo kaji salvaje? 

De otra parte, Vyernes pasado, a la sorpreza de munchos politisyanos i djornalistos fransezes, ‘Nicholas Dupon Aignan’ fervyente admirador del General de Gaule i shefe del partido ‘Debout la France’ se adjunto a Marine Le Pen. Portanto en un pasado no muy leshano el mizmo ‘Nicholas Dupon Aignan’avia refuzado una aliansa kon el ‘Front National’ i avia mizmo dicho “Eske se puede konfiar las yaves de la Fransya a la famiya Le Pen?”

Tambyen de otra parte: a syertos momentos.

 Munchos simples sitizanos se demandan kon anksyedad, si en frente del ekstremizmo del partido de Jean Luc Melenchon, el reel sosyalismo se topa aktualmente en estado de perdisyon kon el rezultado de solo 6,3% ke Benoit Hamon pudo obtener en la ultima eleksyon?

Eske la Fransya de Montaigne, Leon Blum i Mendes France, la Fransya de la “Deklarasyon de los derechos del ombre” ke fue uno de los mas rezyos pilares del grande desvelopamyento de la sivilizasyon, se topa en este momento debasho la posibilidad de tener komo prezidente Marine Le Pen ija de ‘Jean Marie Le Pen’ el kual despues la segunda gerra mundyal konsidero “la eksterminasyon de 6 milyones de djudyos i de una muy grande kuantidad de bohemyanos” komo un simple detalyo?

Mizmo si oy en dia ‘Marine le Pen’ se esforsa de tener una atitud muncho mas favoravle en direksyon de la komunidad djudia, no mos olvidaremos ke la mayor parte de sus kolavoradores son vyejos enemigos del djudaizmo.

Vinyendo a Emmanuel Macron ke fue el verdadero loreato de ‘la primera parte de la eleksyon prezidensyal’, el es una mueva figura muy simpatika de la politika franseza, personaje ke durante los tres ultimos mezes del governo de François Hollande, okupo la funksyon de Ministro de la Ekonomia, todo en no syendo myembro aktivo del partido sosyalisto ma shefe del movimyento “En Marche”.

La Eleksyon prezidensyal en Fransya es kompuesta de dos aktos, ‘el primer para eskojer los dos mas fuertes kandidatos’ i ‘el segundo para nombrar entre eyos dos, el ke es el mas adekuado a okupar el posto prezidensyal’.

Despues de aver manifestado una grande alegria a la sigida del primer rezultado, Emmanuel Macron sintyo el menester absoluto de prezentar lo ke sera su aktividad si es elijido futuro prezidente de la Republika Franseza.

Todo en deklarando ser un grande partizano de la Unyon Evropea, el afirmo ke uno de sus prinsipales objetivos para la Fransya es de venser:

A) La inyoransya: en empesando a aparejar los ninyos para el primer periodo eskolaryo desde la edad la mas chika posivle. No es admisivle ke a la fin de sus estudyos primaryos un elevo no sepa ni meldar ni eskrivir. 

B) El dezempyego/(shomaje): konsekuensa munchas vezes de la instalasyon de multiples frabrikas fransezas en diferentes payizes ajenos ahuera de Fransya.

C) La Provedad: triste erensya del dezempyego komo tambyen de la inyoransya.

El prezidente del partido “en Marche” afirmo tambyen ke dezea azer una reforma profunda del kodigo konsernando ‘el Lavoro’.

El disho: “Je me battrai pour qu’il y ait une reprise du site de Whirlpool” lo ke (kon palavras enteramente diferentes) sinyifika: Vo luchar de todas mis fuersas para ke ningun lavorante pyedra su pan kotidyano a la sigida de kualkyer transferansya i instalasyon de una fabrika franseza en un otro payis.

En efekto, en los dias ande el era ministro debasho la prezidensya de François Hollande, Emmanuel Macron avia deklarado: “Kuando una fabrika o otra grande ‘entrepriza’ serra sus puertas, kale ke los dirijentes tengan kargo de los salaryados”; eyos deven desidir en un plano sosyal i ser jenerozos. La primera koza a azer es de venser los terrivles danyos del ‘dezempyego’.

A notar ke munchos ombres politikos yaman sus partizanos a votar por Emanuel Macron i ke Jean-Luc Melenchon ke avia los primeros dias deklarado no kerer personalmente votar, demando a sus partizanos de en todo kavzo, “No votar por Marine le Pen”.