Ya se ke el sujeto de mi artikolo de esta semana no es adekuado a lo ke deve ser la atmosfera de estos dias de Pesah, ma este anyo en estos mizmos dias ande todos deviamos ser unidos en la alegria i las preguntas yenas en mizmo tyempo de sehel i de inosensya, en estos dias de primavera ke es el renasimyento de la natura i ansi la viktorya de la Vida kontra la Muerte, muevas olas de salvajeria afluen sovre el mundo.
El Ser umano se izo kruel i munchas vezes inkonsyente, dirijido por fuersas oskuras ke paresen emanar de un egoizmo indomptavle ke lo empide de ver klaro.
En los aktos kriminales aktuales el elemento prinsipal no es ‘ke tal o tal otro enemigo es vizado’, ma ‘ke parselas de umanidad dezaparesen en el odyo’.
Ay de esto unos kuantos dias, fue el atake imprevisto del metro de Saint Petersburg ke kosto la vida a munchos pasajeros inosentes; poko mas tadre se produzyo en Oslo el akto terroristo de un konduktor de karo ke se dirijo voluntaryamente sovre pasantes deskonosidos en el solo buto de darles la muerte … I entre los dos kavzos kriminales: el orrivle drama en Siriya ande (aun la interdiksyon absoluta de utilizarlos) los kapos del payis emplearon produktos kemikos para eksterminar kaji 100 personas entre las kualas a lo manko 20 ninyos ke fueron arrankados a la vida en estado de terrivles sufriensas, sin ninguna esperansa de remisyon.
Immedyatamente despues este fakto inyovle uvo komo un muy kurto momento de indesizyon de parte de los grandes payizes i de las altas Instansyas Juridikas del mundo, ma poko mas tadre en sinyo de absoluta indinyasyon, los Estados Unidos de Amerika (sovre el orden del aktual prezidente Donald Trump) mandaron golpes punitivos sovre el payis responsavle.
Oy dos fuersas militaryas (kontraryas la una a la otra) paresen kerer dirijir el mundo en semejantes kavzos: De una parte al lado de los Estados Unidos, munchos payizes evropeos tal la Fransya, la Almanya, la Inglaterra i otros, ansi ke potensyas asiatikas tal: la Turkia, la Arabia Seudita, Israel ets… De otra vanda, los amigos de Bashar al-Assad, tal Putin shefe inebranlavle de la Rusia, i el Iran dezeozo de parvenir a fabrikar la bomba atomika i pueder ansi azer oir su boz.
Ke va salir del enfrentamyento de estos dos blokes de fuersas kontraryos el uno al otro? Kestyon ke asta oy en dia keda sin repuesta.
El ministro de los Echos estranjeros de Rusia, Serguev Lavrov, desmentyo la utilizasyon de bombas kimikas i reafirmo la voluntad de su payis de syempre apoyar la governansa de Bashar al-Assad.
A estos dramas, vyene tambyen de adjuntarse la trajedia de los asaltos kontra dos eglisyas koptas en Ayifto, lo ke kavzo la muerte de un shifro bastante alto de sitizanos Kristyanos.
Es verdad ke en la Istorya de la Umanidad uvo syempre de una manera mas o menos frekuente, periodos ande fuersas negativas sigyeron fuersas pozitivas i tambyen lo kontraryo: epokas de real adelantamyento i rafinamyento despues anyos de salvajeria ….
Mas tadre ke la epoka leshana de la filozofia grega iluminada por la sagasidad de grandes espritos komo Sokrates, Platon, Euripidus, Aristoteles, ets… uvo los anyos obskuros i krueles de los kruzados.
Despues del “Tyempo de Oro” durante el kual los savyos de las tres grandes Relijyones Monoteistas eran avyertos los unos a los otros, soplaron olas de antisemitizmo ansi ke dekretos empapados de ostilidad kontra el Djudaizmo….
La Umanidad konosyo la epoka del Renasimyento kon Leonardo de Vinci i munchos otros savyos i eskritores, ma dospues nombrozos anyos de splendor, eya konosyo igualmente el obskurantizmo relijyozo segido el mizmo en Evropa por el “siglo de las luzes”.
En su livro entitolado “Tsedek, droit hébraique et Science de la paix” el profesor Henri Baruk eskrivyo: “Aktualmente los prinsipyos fundamentales de moralidad son no solo kombatidos ma envezes mizmo enteramente anihilados.”
Eyos disheron...
K.P.
No basta de denunsyar la indjustisya, kale ser pronto a kombatirla.
- Albert Camus.
Krear es bivir dos vezes… krear es tambyen dar una forma a su destino.
- Albert Camus
Ay en el Ombre mas kozas a admirar ke a meprizar
- Albert Camus
Para konvenser, la palavra tyene mas fuersa ke la eskritura.
- René Descartes.
La vida es reelmente simple, ma mos esforsamos de azerla komplikada..
- Conficius.
