Pesah

En la Agada de Pesah meldamos los 4 ijos. Uno es el “Haham / savio”, uno es el “Rasha / negro”, uno es el “Tam / inosente (saf)” i el kuatren es el “Ve Sheeno Yodea Lishol / Ke no save demandar”.

La Agada dize ke kale dar la repuesta a kada un ijo kuando demandan por ke estamos azyendo esto todo en la meza? Ken son estos ijos? En los diyas ke estamos bivyendo oy, todo esta trokando. Yo vos va kontar ken son estos ijos en el mundo moderno. 

“Haham / El savio” es el nono ke save la ley, la kultura i ke lo paso esta kultura a su ijo. Ma su ijo no esta en mizma idea kon su padre. El estudyo en las mijores eskolas, se ambezo las otras kulturas, i esta pensando ke kale aunarse mezmo kon otras kulturas. El no kere ser solo Judyo, el kere pareser a otros, i ser uno de los otros. Este ijo es “Rasha”.

El ijo de Rasha es “Tam / inosente (saf)”. Por una parte mira a su nono ke praktika la ley, por la otra parte mira a su padre ke no tyene dar i aver kon la ley. No save kualo azer, ken esta azyendo lo derecho, a ken kale oyir, a su padre o a su nono? No estudyo la ley komo su padre, el korason esta kon su nono, ma el kamino de su padre le vyene mas kolay.

El ijo de “Tam” va ser “Sheeno Yodea Lishol / Ke no save demandar”. El nono no esta bivyendo, el granpapa (Rasha) ke esta rechasando la ley, el padre ke no save kualo va azer (Tam). En esta atmosfera ke se engrandesyo este ijo, no va pueder entender kualo es lo derecho.

La Agada no konta por el, el ijo de “Sheeno Yodea Lishol”. Porke la sinkena jenerasyon no va ser en la meza de la noche de Pesah, este ijo no va saver la kultura Judiya i se va asimilar. Este tablo es muy triste ma por no ser komo la sinkena jenerasyon, semos ovligados de dar edukasyon Judiya a la famiya, i kontinuar la kultura.

Pesah Alegre kon todos los ijos i toda la famiya en la meza.

Ester Asa / Estambol

[email protected]