Los guesos de Jozef Mengele utilizados en los kursos de medisina en Brazil

Dora NİYEGO Judeo-Espanyol
29 Mart 2017 Çarşamba

Mas de trenta anyos, los guesos de Jozef Mengele, el mediko alman ke izo orivles eksperimentos enriva de miles de judios en Auschwitz, estuvieron serrados en una bolsa de plastika, en el Instituto Mediko en Saõ Paulo.

El Dr. Daniel Romero Muñoz, ke dirijo el ekipo ke identifiko los restos de Mengele en 1985, topo una oportunidad para utilizarlos. Unos kuantos mezes antes, el shef del departamento de medisina legal en la Fakultad de Medisina en la Universidad de Saõ Paulo, tomo permision para utilizarlos en sus kursos de medisina. Oy, los estudiantes estan egzaminando los guesos de Mengele, i estan komparandolos kon la enformasion en el rejistro de Mengele, ke es nombrado komo “el anjelo de la muerte”.

“Los guesos van a ser utilizados para ensenyar los estudiantes, en egzaminando estos guesos. La enformasion obtenida va ser komparada kon los dokumentos de Mengele”, disho Muñoz.

Mengele murio kuarenta anyos antes, kuando se aogo en en el bodre de mar de Saõ Paulo. Estuvo eskondido en Saõ Paulo munchos anyos, aziendo eksperimentos.

En egzaminando los guesos, vieron ke Mengele teniya una rotura en el gueso pelvis. Kuando lo kompararon kon la enformasion en su rejistro, vieron ke se aviya rompido el pelvis en un aksidente de motorsikleta en Auschwitz, (el kampo de eksterminasyon nazi en Polonya).

Egzaminando la kavesa de Mengele, toparon un burako en la kara ke puediya ser el rezultado de un sinuzit. El marido i mujer ke guadraron Mengele en Brazil, disheron a la polisia, ke Mengele se keshava de apses en los dientes.

En una entrevista kon una sovrebiviente Cyrla Gewertz (92 anyos), la sovrebiviente disho ke Mengele la izo dezmudar i entrar en una kuvet yena de agua muy kayente. ‘Si no aksepto de entrar, el disho ke me iva matar’ esta diziendo Gerwertz. ‘Despues ke entri ariento de la agua kayente, me izo entrar en una kuvet yena de agua yelada. Estas son memorias ke nunka puedo olvidarme.

La sovrebiviente disho ke, una vez, lo vido a Mengele, arondjando una ijika mueva nasida, del tejado del kampo.

Despues de la gerra, kuando los prensipales nazis fueron djuzgados por los asasinatos (cinayet) de gerra, Mengele se fuyo a la Arjantina, i bivio diez anyos en Buenos Aires.

Mengele se fuyo a Paraguay kuando los ajanes de Mossad lo apanyaron a Adolf Eichmann, ke tambien biviya en Buenos Aires. En el anyo 1960, Mengele vino a Saõ Paulo, ande el kuplo alman Wolfram i Lisolette Bossert lo eskondieron.

Mengele, kuando teniya 67 anyos, murio nadando en una plaj en la sivdad Bertioga en el anyo 1979. El kuplo Bossert lo enterraron en Embu afuera de Saõ Paulo, kon el nombre Wolfgang Gerhard. Anyos duspues, las otoridades almanas toparon una karta embiyada por el kuplo Bosserta, a la famiya de Mengele, enformandolos de su muerte. Las otoridades almanas enformaron las otoridades israelienas.

Una profesora de la Universidad de Saõ Paulo, Maria Luiza Tucci Carneiro, disho ke analizando los guesos de Mengele, los estudiantes se van a ambezar no solo medisina, ma tambien estoria i etika.

“Los estudiantes tambien se estan ambezando komo los doktores, los psikiatristos, i otros sientifikos ke estavan en el servisio del Reich, le estavan ambezando las metodes para klasifikar los grupos etnikos, i apartar las razas inferiores”, disho la profesora.